У Магілёўскім абласным кадэцкім вучылішчы прайшла лекцыя прадстаўніка Следчага камітэту па Магілёўскай вобласці. Вучняў пужалі адказнасцю за «экстрэмісцкія» падпіскі і перасылкі. Пра гэта вучылішча паведаміла ў сваім Instagram-акаўнце, заўважылі праваабаронцы «MAYDAY.TEAM».
Візіт СК тлумачыцца прафілактыкай правапарушэнняў у перыяд адпачынку і актыўнага выкарыстання Інтэрнэту.
«Асаблівая ўвага была ўдзелена праблеме распаўсюджвання наркатычных рэчываў і экстрэмісцкіх матэрыялаў праз Інтэрнэт, а таксама адказнасці за ўдзел у падобных дзеяннях. Прыводзіліся канкрэтныя прыклады з практыкі следчых органаў, якія наглядна дэманструюць наступствы неабдуманых дзеянняў у віртуальнай прасторы», – піша вучылішча.
Падлеткаў таксама вучылі распазнаваць «прыкметы ўключэння ў экстрэмісцкую дзейнасць» і далі інструкцыю, што рабіць пры выяўленні ў Інтэрнэце «інфармацыі, якая пагражае грамадству».
«Супрацоўнік Следчага камітэта падкрэсліў важнасць крытычнага мыслення і асцярожнасці пры зносінах у сацыяльных сетках і мэсэнджарах», – гаворыцца ў паведамленні каледжа.
Арсен Рудэнка belsat.eu
