На вайне ва Украіне знік грамадзянін Беларусі Андрэй Кулага, які ваяваў на баку Расеі. Звестак пра яго няма з кастрычніка 2024 года.
«Радыё Свабода» даведалася, што па дапамогу ў пошуку звярнулася ягоная дачка Таццяна.
«2 кастрычніка 2024 году ён пайшоў. А 8:30 раніцы ён здаў тэлефон і з гэтага дня больш ніколі не выходзіў на сувязь», – паведаміла дзяўчына.
Паводле інфармацыі праекта, Андрэй Кулага нарадзіўся 2 чэрвеня 1979 году і жыў у Магілёве, у верасні 2024 году падпісаў кантракт з прыватнай вайсковай кампаніяй «Ястраб», якая пасля падпісання кантракту абяцала ўсім наймітам пералічыць 1,8 мільёна расейскіх рублёў, а далей выплачваць ад 210 тысяч штомесяц.
У 2024 годзе Андрэя Кулагу шукалі пры дапамозе пошукава-выратавальнага атраду «Фенікс». Згодна з тагачаснай аб’явай, ён знаходзіўся ў Санкт-Пецярбургу, а з кастрычніка знік.
Новыя абвесткі аб ягоным пошуку пачалі размяшчаць у студзені 2025 году, але ўжо 19 студзеня пад адной з такіх публікацыяў аўтарка дапісала каментар «знойдзены, жывы».
Раней сваякі двух іншых беларусаў – Яўгена Ільіна і Міхаіла Шалгуна – заявілі, што яны зніклі бязь вестак. Яшчэ адзін беларус – Ігар Хасанаў знайшоўся з раненнем у адным з шпіталяў у акупававанай частцы Луганскай вобласці. Усе яны ваявалі на баку Расеі.
Са студзеня 2025 года таксама няма звестак пра 23-гадовага жыхара Бараўлянаў Дзмітрыя Губіцкага, які ўхіляўся ад службы ў беларускім войску, але добраахвотна пайшоў ваяваць за Расею.
Тэса Анэйда / belsat.eu
