Каб цалкам ліквідаваць міністэрства, патрэбная згода Кангрэсу, але ў Трампа пакуль няма галасоў для гэтага.
Прэзідэнт Амерыкі Доналд Трамп падпісаў указ, якім даручыў міністру адукацыі распачаць закрыццё ўстановы. Ëн заявіў, што міністэрства працуе не эфектыўна: за сорак пяць гадоў пасля стварэння Дэпартамент адукацыі ЗША выдаткоўвае на адукацыю значна больш грошай, чым любая іншая краіна, аднак ЗША ўнізе спісу ў паспяховасці адукацыі.
У прысутнасці школьнікаў за партамі Трамп сказаў: «Мы збіраемся закрыць гэта, і закрыць гэта як мага хутчэй». Прэзідэнт ЗША лічыць, што за чвэрць стагоддзя з моманту стварэння Міністэрства адукацыі яно атрымала 3 трыльёны долараў датацыяў з бюджэту, але эфекту няма.
Нагадаем, такое рашэнне было часткай перадвыбарнай праграмы Трампа. Ëн намагаўся зрабіць гэта яшчэ падчас свайго першага тэрміну, але рашэнне заблакаваў Кангрэс ЗША. Калі Кангрэс узгодніць гэты ўказ, кантроль над адукацыяй будзе ажыццяўляць не асобная ўстанова, а кожны штат паасобку.
Пры гэтым Міністэрства адукацыі ЗША не распрацоўвае навучальных планаў і не прымае рашэнняў у большасці школьных пытанняў, а займаецца кантролем за размеркаваннем сродкаў, у тым ліку праграмай падтрымання малазабяспечаных вучняў.
На мінулым тыдні міністэрства абвясціла, што звальняе амаль палову сваіх работнікаў.
Тэса Анэйда / «Белсат»
