«Белсат» працягвае адсочваць факты рэпрэсіяў у дачыненні да беларусаў і не толькі, як у Беларусі, гэтак і за межамі краіны.
КДБ 20 сакавіка заявіў пра затрыманне супрацоўніка Ашмянскай мытні Дзмітрыя Скубілава, які нібы працаваў на літоўскія спецслужбы.
Расейскі стэндап-комік Арсеній Астанін, якога за жарт затрымалі ў Беларусі на запыт расейскіх праваахоўнікаў, расказаў падрабязнасці таго, як лукашэнкаўскія сілавікі збілі ў лесе перад тым, як перадаць калегам. Яго збівалі ў трох, наносілі ўдары па корпусе і канцавінах. Медычнае абследаванне выявіла пералом пазванка, раны і выціны, а таксама праблемы з дыхальнаю функцыяй і лёгкімі.
Віцебскаму лекару Аляксандру Рандарэнку, асуджанаму да 4 гадоў калоніі, пакінулі без зменаў прысуд – чатыры гады калоніі. Яго асудзілі 23 снежня, абвінаваціўшы ў «рэабілітацыі нацызму» (ч. 1 арт. 130-1 КК) і «распальванні варожасці» (ч. 1 арт. 130 КК). Вярхоўны суд разгледзеў апеляцыйную скаргу палітвязня. Судовая калегія пад старшынствам суддзі Таццяны Васілевіч пакінула прысуд без зменаў.
У Беларусі новае «экстрэмісцкае фармаванне» – аналітычны цэнтр «Цэнтр новых ідэй». Паводле КДБ, дачыненне да праекту маюць Рыгор Астапеня, Леся Руднік, Антон Раднянкоў, Генадзь Коршунаў, Дар'я Рублеўская, Павел Мацукевіч, Стас Гарэлік, Анастасія Жаўрыд.
Журналіст радыё «Свабода» Дзмітрый Гурневіч паведаміў, што супраць 15 журналістаў выдання яшчэ ў 2024 годзе распачалі завочныя крымінальныя справы. Акрамя гэтага, удома ў сваякоў журналістаў сілавікі ладзілі ператрусы і выклікалі іх на допыты.
«Экстрэмісцкімі» прызнаныя ўсе сацсеткі партыі «Беларуская хрысціянская дэмакратыя»: старонкі ў «Х», «Youtube», «Укантакце», «Telegram», «Facebook». Таксама спіс «экстрэмісцкіх» матэрыялаў папоўнілі Facebook-старонка «olga.karatch.belarus», суполкі ў «Аднакласніках» «Свабодныя людзі», «Объявления Пинска – Pinsk.Biz», «Объединенный штаб Тихановской, Бабарико и Цепкало», «Брест. Вчера и Сегодня», «Есть такие Чудесные Люди», «Г.Пинск 85рп 1985-1989г.г»., Telegram-канал і ўсе візуальныя матэрыялы суполкі «Tactical group ATHENA | АФІНА», суполку ва «Укантакце» «Общество защиты мира и Справедливости», чат, лагатып і ўсе візуальныя матэрыялы Telegram-канала «Витебск, я гуляю!», суполка ў Тэлеграме «Стромкае піке», а таксама яе лагатып і ўсе візуальныя матэрыялы, старонкі ў Instagram «xbazyl», «mindend._», старонка ў «Аднакласніках» «Tamara De Gennaro (Машарская)», Youtube-канал «Беларусь live», сайт, старонкі ў Facebook, Instagram, Youtube, X суполкі «Belarus Together – БЕЛАРУСЬ РАЗАМ», Тэлеграм-каналы «Правий Берег Київ | Киев», «Типичная Беларусь Chat», старонка ў «Аднакласніках» «Страна Для Жизни».
Якуб Хруст belsat.eu
