Міністэрства абароны Вялікай Брытаніі са спасылкай на звесткі вайсковай выведкі падлічыла страты Расеі ў вайне супраць Украіны. І адзначыла, што для ўладаў РФ гэтыя страты мала што значаць.
Паводле брытанскай выведкі, Збройныя сілы Расеі з 2022 года страцілі ва Украіне каля 900 000 вайскоўцаў забітымі і параненымі. З іх загінулі 200 000-250 000 расейскіх вайскоўцаў, што «з'яўляецца найбуйнейшымі стратамі Расеі з часоў Другой сусветнай вайны».
Пры гэтым адзначаецца, што Уладзімір Пуцін і расейскае вайсковае кіраўніцтва, хутчэй за ўсё, ставяць свае мэты ў вайне вышэй за жыцці расейскіх жаўнераў. Як мяркуецца, яны гатовыя няспынна трываць пастаянна высокія паказнікі страт, пакуль гэта не адабʼецца негатыўна на падтрыманні грамадствам ці элітамі вайны.
Таксама адзначаецца, што ўлады РФ надаюць значна меншае значэнне жыццям грамадзянаў этнічных меншасцяў Расеі з бедных рэгіёнаў. Іх вярбуюць значна больш у параўнанні з этнічнымі расейцамі з Масквы і Санкт-Пецярбургу.
Нагадаем, што ўвечары 18 сакавіка кіраўнік Расеі у размове з прэзідэнтам ЗША Доналдам Трампам паабяцаў спыніць абстрэлы ўкраінскай энергетычнай інфраструктуры на 30 дзён. Абмежаванае спыненне агню не пратрымалася і дня. У сваю чаргу Еўрапейская Рада – найвышэйшы палітычны орган Еўрапейскага Звязу – заклікала «Расею праявіць рэальную палітычную волю, каб пакласці канец вайне».
Якуб Хруст belsat.eu
