Еўрапейская Рада – найвышэйшы палітычны орган Еўрапейскага Звязу, што складаецца з кіраўнікоў дзяржаваў і ўрадаў краінаў-чальцоў ЕЗ – 20 сакавіка пасля абмену думкамі з Уладзімірам Зяленскім прыняла заяву адносна Украіны. Яе падтрымалі 26 з 27 дзяржаваў.
У заяве Еўрапейская Рада пацвярджае сваё падтрыманне незалежнасці, суверэнітэту і тэрытарыяльнай цэласці Украіны ў яе міжнародна прызнаных межах. Найважнейшымі кампанентамі гэтага названая максімальна моцная пазіцыя Кіева, з уласнымі магутнымі войскамі і абароннымі магчымасцямі. Таму Еўразвяз застаецца прыхільным наданню «далейшага ўсебаковага падтрымання Украіне і ейнаму народу, бо яна рэалізуе сваё неад'емнае права на самаабарону ад агрэсіўнай вайны Расеі».
Падтрымліваючы «ўсёабдымны, справядлівы і трывалы мір, заснаваны на прынцыпах Статуту ААН і міжнароднага права», і вітаючы ўсе намаганні па яго дасягненні, Еўрапейская Рада заклікае «Расею праявіць рэальную палітычную волю, каб пакласці канец вайне».
У заяве падкрэсліваецца, што надзейны шлях да міру павінен уключаць абмен ваеннапалоннымі, вызваленне мірных жыхароў і вяртанне ўсіх украінскіх дзяцей і іншых грамадзянскіх асобаў, незаконна дэпартаваных і перададзеных у Расею і Беларусь.
Еўрапейскі Звяз заяўляе пра гатовасць узмацніць ціск на Расею, у тым ліку з дапамогай новых санкцыяў і закрыцця шчылін у дзейных, «каб аслабіць яе здольнасць працягваць сваю агрэсіўную вайну».
Дакумент адзначае, што Украіна павінна атрымаць надзейныя гарантыі бяспекі для стрымлівання будучай расейскай агрэсіі. Таму Еўразвяз працягне падтрымліваць здольнасць Украіны «эфектыўна абараняць сябе», а таксама надаваць ёй «рэгулярнае і прадказальнае фінансавае падтрыманне» і ўзмацняць вайсковае падтрыманне. Дакумент заклікае дзяржавы-чальцы «тэрмінова актывізаваць намаганні ў задавальненні надзённых вайсковых і абаронных патрэбаў Украіны».
Нагадаем, што ўвечары 18 сакавіка кіраўнік Расеі Уладзімір Пуцін у размове з прэзідэнтам ЗША Доналдам Трампам паабяцаў спыніць абстрэлы ўкраінскай энергетычнай інфраструктуры на 30 дзён. Абмежаванае спыненне агню не пратрымалася і дня.
Якуб Хруст belsat.eu
