20 сакавіка адбылася тэлефонная размова Аляксандра Лукашэнкі з Уладзімірам Пуціным. Прэс-службы кіраўнікоў дзвюх краінаў зрабілі розныя акцэнты на тэмах, якія абмяркоўваліся падчас тэлефанавання.
У прэс-службе Аляксандра Лукашэнкі расказалі, што размова доўжылася амаль гадзіну. Пры гэтым асноўная ўвага звернутая на інтэграцыю, дзейнасць ЕАЭС, нядаўні візіту Лукашэнкі ў Расею і графік будучых кантактаў.
Апошняю тэмаю размовы названае інфармаванне Уладзімірам Пуціным пра нядаўнюю размову з прэзідэнтам ЗША Доналдам Трампам, у тым ліку адносна Украіны. Пры гэтым у Крамлі «развіццё сітуацыі вакол Украіны» ў апісанні размовы паставілі вышэй за ЕАЭС і будучыя кантакты.
Як адзначаецца, падчас размовы было «выказанае задавальненне канструктыўным і змястоўным характарам» візіту Лукашэнкі ў Маскву.
Нагадаем, што Лукашэнка быў у Маскве менш як тыдзень таму – з 13 да 15 сакавіка. Там ён пераконваў Расею, што ўсяляк падтрымлівае «паглыбленне інтэграцыі» і ніколі не нанясе Расеі «ўдару ў спіну», а размовы пра «дармаедства Менску» называў беспадстаўнымі.
Якуб Хруст belsat.eu
