Кіраўнік Расеі Уладзімір Пуцін падпісаў указ, паводле якога грамадзяне Украіны павінны да 10 верасня ўзаконіць сваё знаходжанне на тэрыторыі Расеі або ж пакінуць краіну.
«Грамадзяне Украіны, якія знаходзяцца ў Расейскай Федэрацыі, якія не маюць законных падстаў для знаходжання (пражывання) у Расейскай Федэрацыі, абавязаныя самастойна выехаць з Расейскай Федэрацыі або да 10 верасня 2025 года ўключна ўрэгуляваць сваё прававое становішча ў Расейскай Федэрацыі», – гаворыцца ў дакуменце.
Гэта датычыць у тым ліку жыхароў акупаваных частак Данецкай, Луганскай, Запарожскай і Херсонскай вобласцяў Украіны.
Міністэрству аховы здароўя Расеі даручана правесці медагляд грамадзянаў Украіны на ВІЧ, інфекцыйныя захворванні, а таксама на ўжыванне наркотыкаў і псіхатропаў.
З 5 лютага ў Расеі працуе «рэестр кантраляваных асобаў» МУС, куды ўключаюць замежнікаў, што незаконна знаходзяцца ў РФ. На акупаваных тэрыторыях Украіны ў яго заносілі ўкраінцаў, якія не атрымалі расейскія пашпарты. Падставай для законнага знаходжання замежнікаў у Расеі ёсць від на жыхарства або дазвол на часовае знаходжанне. Тэрмін часовага знаходжання вызначаецца тэрмінам візы, але можа быць прадоўжаны пры выдачы дазволу на працу.
Таксама ў Расеі з лютага дзейнічае рэжым высылкі нелегальных мігрантаў. Такія асобы павінны ўзаконіць сваё знаходжанне або пакінуць Расею да 30 красавіка.
Фактычна грамадзянам Украіны, якія пражываюць на акупаваных тэрыторыях і не атрымалі расейскія пашпарты, прыраўнялі да нелегальных мігрантаў.
Якуб Хруст belsat.eu
