Пакуль увесь свет сочыць за намаганнямі ЗША ўрэгуляваць вайну Расеі супраць Украіны ды хадою перамоваў Вашынгтону і Масквы, у Белым доме неяк практычна незаўважна для нашага парадку дня адбыўся адзін надзвычай важны і паказальны візіт. 17 сакавіка – у Дзень святога Патрыка – прэзідэнт Злучаных Штатаў прымаў у сябе самага славутага з сучасных ірландцаў – Конара МакГрэгара.
Конар МакГрэгар – першы ў гісторыі чэмпіён UFC (найбуйнейшая арганізацыя ў змяшаных двубоях) у дзвюх вагавых катэгорыях і бясспрэчна найбольш папулярны баец ММА. Вашынгтон ён наведаў адмыслова, каб сустрэцца з Трампам, які раней публічна захапляўся ягонымі байцоўскімі якасцямі і неаднаразова прысутнічаў на буйных турнірах UFC.
Здавалася б, што тут незвычайнага? У Авальным кабінеце гасцявалі прадстаўнікі розных відаў спорту – у залежнасці ад прыхільнасцяў гаспадара памяшкання ў той ці іншы час. Аднак беспасярэдне перад сустрэчаю МакГрэгар выступіў з прамовай у Белым доме і па старой звычцы тут жа зрабіўся галоўным ньюзмэйкерам. Не магу прыгадаць, каб на маёй памяці хтось у гэтым будынку з такім сакавітым акцэнтам і непадробнымі эмоцыямі выдаваў гэтакія радыкальныя заявы.
Кароткі змест: «Наш урад даўно адмовіўся ад галасоў народу Ірландыі… Нелегальны іміграцыйны рэкет разбурае краіну… Ірландыя – за крок ад таго, каб згубіць сваю ірландскасць… Урад знішчыў краіну з дапамогай іміграцыі і яе абялення праз ручныя медыі. Нашыя грошы ідуць за межы краіны, на рэчы, якія не маюць нічога супольнага з ірландскім народам». Карацей, усё цалкам у духу цяперашняга кіраўніцтва ЗША і не ў духу паліткарэктнасці.
Адразу заўважу, што грунтуецца гэтае выказванне ў тым ліку на сапраўдных звестках. Гэтак, паводле статыстыкі, за апошнія тры гады ў Ірландыю прыбылі больш за 350 тысяч мігрантаў. Абсалютная бальшыня – з нееўрапейскіх краінаў. Пры насельніцтве каля 5,2 мільёна чалавек лічба даволі істотная. На гэтым фоне Цэнтральная статыстычная ўправа (Central Statistics Office) паведамляе, што ў Ірландыі ўзрасла злачыннасць. Гэтак, з 2023 года колькасць злачынстваў з узломам вырасла на 10 %, крадзяжоў – на 7 %.
Рэакцыі на выступ МакГрэгара ў Белым доме пасыпаліся тут жа. З аднаго боку – шквал захаплення ў сацыяльных сетках: «рубануў праўду-матку», «Конара – у прэзідэнты» і гэтак далей. З другога – найгучней словам байца абурыўся еўрапейскі палітычны істэблішмент. Найбольш паказальнаю была заява нядаўняга лідара Сацыял-дэмакратычнай і лейбарысцкай партыі ў Паўночнай Ірландыі Колума Істўуда: «Конар МакГрэгар ніколі ні на што не абіраўся, ён не рэпрэзентуе ірландскага народу. Насамрэч мы ўсе вельмі збянтэжаныя ім».
Што датычыць медыяў, то хоць малая частка і падтрымала такое агучванне байцом праблемаў, але ж збольшага можна ўбачыць разгромныя матэрыялы. Цікава, што лейтматыў у іх пераважна такі ж, як і ў Істўуда. Маўляў, хто такі МакГрэгар, рэпутацыя ў яго сумнеўная, а заявы неэтычныя і ксенафобскія.
Так, сапраўды, МакГрэгар далёка не святы. Ягоны псеўданім Notorious (можна перакласці як Сумнавядомы) робіцца ўсё больш праўдзівым адлюстраваннем рэальных паводзінаў, а не часткаю збудаванага іміджу байца. Конар не выступае ўжо больш за тры гады і прысутнічае ў навінах збольшага як герой скандалаў: ад пляўкоў у фаната суперніка да прысуду выплаціць амаль 250 тысяч еўраў жанчыне, якая абвінаваціла МакГрэгара ў гвалце. Увогуле, нягледзячы на ўсе спартовыя дасягненні, самы вялікі на ягонай старонцы ў «Вікіпедыі» – раздзел «абвінавачванні і кантраверсіі».
,,Але хто такія тады цяперашнія еўрапейскія палітыкі, калі замест іх амаль 40-мільённай ірландскай дыяспары ў ЗША з самай высокай трыбуны аб праблемах сваёй краіны (дый праблемы гэтыя існуюць не толькі ў Ірландыі, калі быць шчырымі) апавядае вось такі персанаж ды знаходзіць пры гэтым немалое падтрыманне? Як Еўропа ўвогуле апынулася ў такой сітуацыі?
І ведаеце, я прагугліў, хто такі Колум Істўуд, якому так не спадабаліся выказванні МакГрэгара. Аднак увогуле не змог знайсці згадкі пра нейкі працоўны шлях гэтага дэпутата Палаты прадстаўнікоў Вялікай Брытаніі. А чалавеку 41 год. Прафесійны палітык – звычайная справа для Захаду. Вось чые, скажыце мне, інтарэсы можа рэпрэзентаваць такі «слуга народу»? Дарэчы, падобныя кар’еры мы можам назіраць у чыноўнікаў Лукашэнкі ад ідэалогіі – з БРСМу праз прафсаюзы ў райвыканкамы. І мы ж з вамі добра ведаем, куды такія спецыялісты могуць давесці краіну.
Таму можаце хоць тысячу разоў не пагаджацца з меркаваннем МакГрэгара, але нельга не прызнаваць таго факту, што ён усяго ў сваім жыцці дабіўся цяжкаю працай. Ад дублінскага сантэхніка, якога падчас трэнінгаў утрымлівала жонка, да статусу галоўнай зоркі ММА, дзякуючы якой іншыя байцы ўрэшце пачалі атрымліваць прыстойныя ганарары. Ён дакладна прайшоў, так бы мовіць, усе ўзроўні жыцця і сацыяльнага становішча. І добра ведае, пра што гаворыць. Адпаведна, можа дазволіць сабе казаць тое, што хоча і дзе хоча. Бо ўрэшце расплочвацца за свае дзеянні ў выпадку чаго будзе з уласнай кішэні. І не дзіва, што менавіта з МакГрэгарам ахвотна размаўляюць у Белым доме. Які, дарэчы, спадар Істўуд летась адмовіўся наведаць з прычыны… падтрымання Злучанымі Штатамі Ізраілю! Цяпер, падобна, і не паклічуць.
Выглядае, старому еўрапейскаму палітычнаму істэблішменту давядзецца альбо імкліва пасталець і вярнуцца на зямлю ў рэчаіснасць сваіх грамадзянаў, альбо іх пад іхныя ж енкі пра неэтычнасць і патрабаванні паліткарэктнасці з трэскам павыкідаюць з кабінетаў такія людзі, як Конар МакГрэгар. Бо ўжо што-што, а публічна выступаць сусветна прызнаны майстар трэш-току ўмее дакладна не горш, дый касцюм на ім сядзіць, як бачыце, няблага.
