Курс амерыканскай і еўрапейскай валютаў расце другі дзень запар пасля самага істотнага за паўтара года падзення. Паводле курсу Нацыянальнага банку, заўтра долар будзе каштаваць 3,1256 рубля, еўра – 3,3911 рубля.
Долар і еўра пачалі істотна ды амаль сінхронна таннець у Беларусі 7 сакавіка і дасягнулі мінімумаў за паўтара года 19 сакавіка. Курс амерыканскай валюты знізіўся з 3,2424 рубля да 3,0554 рубля, еўра – з 3,4924 рубля да 3,3455 рубля.
Таксама ў гэтыя дні таннеў кітайскі юань, а вось расейскі рубель, наадварот, рос.
Аднак цяпер долар і еўра пакрысе адыгрываюць падзенне. Паводле курсу Нацбанку, сёння амерыканская валюта каштуе 3,0794 рубля, курс на заўтра рэгулятар падняў да 3,1256 рубля.
За еўра сёння даюць 3,3574 рубля, курс на заўтра – 3,3911 рубля.
Як тлумачыла раней «Белсату» эканамістка даследчага цэнтру BEROC Настасся Лузгіна, долар у Беларусі паўтарае сітуацыю ў Расеі з увагі на моцную залежнасць нашай эканомікі ад усходняй суседкі. Тамтэйшы рубель таксама апошнімі днямі істотна ўмацоўваўся да долара, да таго ж амерыканская валюта зніжалася па ўсім свеце.
Экспертка пры гэтым адзначала, што долар не будзе таннець бясконца, таму пры патрэбе цяпер добры час, каб набыць крыху валюты:
,,«Гэта не рэкамендацыя і не рада, аднак, калі камусьці трэба долары, цяпер спрыяльны момант для пакупкі».
Лузгіна папярэдзіла: цяпер беларускі рубель ідзе следам за расейскім, аднак сітуацыя ў нашай эканоміцы такая, што ён можа выправіцца ў «самастойнае падарожжа». Гэта звязана з дэфіцытам вонкавага гандлю, калі краіна купляе імпартнага болей, чымся прадае за мяжу:
«Пакуль гэта асабліва не адбіваецца на валютным рынку, але, калі гэта працягнецца, ціск на беларускі рубель можа ўзмацніцца. У гэтым выпадку можа адбыцца зніжэнне беларускага рубля з беларускіх прычынаў, але пакуль мы гэтага не назіраем».
Сцяпан Кубік belsat.eu
