Менская епархія арганізавала збор рэчаў для жыхароў Курскай вобласці, што ў Расейскай Федэрацыі. Такую абвестку можна прачытаць сёння ў самым цэнтры беларускай сталіцы на Вайсковых могілках.
Царкоўнікі заклікаюць здаваць асенне-зімовае адзенне, абутак, а таксама спальныя рэчы. Вялікімі літарамі ў абвестцы вылучана, што рэчы мусяць быць толькі новыя. Прыём ажыццяўляецца сінадальным аддзелам царкоўнай дабрачыннасці.
Нагадаем: летась 6 жніўня ўкраінскія вайскоўцы занялі горад Суджу ў Курскай вобласці і некалькі населеных пунктаў. Ваенныя аналітыкі звязвалі ўварванне на тэрыторыю Расеі са спробаю адцягнуць сілы ворага ад Сумскага і Харкаўскага напрамкаў. Частка мясцовых жыхароў эвакуявалася. Але гэтыя людзі выстаўлялі прэтэнзіі ўладам, што не атрымалі ад іх абяцаных кампенсацыяў і жытла, на якое яны разлічвалі. Многія вярнуліся ў свае дамы.
Абвестка пра збор рэчаў у Менску з'явілася менавіта ў той момант, калі ўкраінскія вайскоўцы пакінулі амаль усю Курскую вобласць. А расейскія прапагандысты пачалі рабіць ўкіды пра тое, што на Куршчыне ўкраінскія вайскоўцы не адступілі, а былі знішчаныя. Камандаванне ЗСУ зняпраўджвае гэтую інфармацыю. Тым часам расейскія акупанты пачалі інтэнсіўны абстрэл Сумскай вобласці, у прыватнасці, тых населеных пунктаў, дзе няма ніякіх вайсковых аб'ектаў і застаюцца мірныя людзі. Абстрэлы дасягнулі такой інтэнсіўнасці, што няма магчымасці эвакуяваць насельніцтва. Многія дамы сцёртыя з зямлі. Людзі хаваюцца ў падвалах.
У звароце царкоўнікаў не паведамляецца, навошта збіраць рэчы для жыхароў Курскай вобласці.
Любоў Лунёва
