Украіна вярнула дадому 175 вайскоўцаў з расейскага палону ў абмен на такую ж колькасць расейскіх вайскоўцаў 19 сакавіка. Яшчэ 22 цяжкапараненыя байцы перададзеныя Украіне Расеяй «у якасці жэсту добрай волі», паведамляе Мінабароны Расеі.
Прэзідэнт Украіны Уладзімір Зяленскі пацвердзіў гэтую інфармацыю.
«Сярод іх цяжкапараненыя і ваяры, якіх Расея пераследавала за выдуманыя злачынствы. Усім неадкладна будзе аказаная неабходная медычная і псіхалагічная дапамога», – распавёў Зяленскі пра стан украінскіх вайскоўцаў, вернутых дадому.
Мяркуючы з паведамлення расейскага боку, абмен праходзіў праз Беларусь.
«Цяпер усе расейскія вайскоўцы застаюцца на тэрыторыі Рэспублікі Беларусь, дзе ім аказваецца неабходная псіхалагічная і медычная дапамога, а таксама дадзеная магчымасць звязацца са сваякамі.
Пры вяртанні расейскіх вайскоўцаў з палону пасярэдніцкія намаганні гуманітарнага характару аказалі Аб'яднаныя Арабскія Эміраты», – піша Мінабароны Расеі.
Арсен Рудэнка belsat.eu
