У гэтую нядзелю, 23 сакавіка, у польскай сталіцы адбудзецца імпрэза, прысвечаная Дню Волі. Арганізатары расказалі, што чакае ўдзельнікаў.
Месцам збору ўдзельнікаў вызначаны пляц Трох Крыжоў. Імпрэза пачнецца там а 13-й гадзіне. Плануецца прамова ксяндза Вячаслава Барка, грамадска-палітычныя дзеячаў, а таксама выступ украінска-беларускага фолк-гурта «Captain Hmiel».
Пазней з гэтай плошчы пачнецца шэсце, якое мае ўпрыгожыць 330-метровы бел-чырвона-белы сцяг, што панясуць удзельнікі. Дэманстрацыя завершыцца на Замкавым пляцы, дзе будуць прамаўляць беларускія палітыкі, у тым ліку Павел Латушка, Павел Баркоўскі, Анжаліка Мельнікава і Вячаслаў Сіўчык.
Арганізатары паабяцалі багата інтэрактыву. У праграме, напрыклад, – спевы з лідарам гурта «Dzieciuki» Алесем Дзянісавым, танцы з удзелам прадстаўнікоў Школы беларускай традыцыйнай культуры.
Закрываць імпрэзу будзе акустычны выступ беларускага гурта з Беластоку «Kurwadziki».
Сёлета арганізатарамі свята выступілі: «Беларусы Варшавы», Аб’яднаны пераходны кабінет, Офіс Святланы Ціханоўскай, Народнае антыкрызіснае ўпраўленне, Беларускае аб’яднанне палітвязняў «Да волі», Музей Вольнай Беларусі, рух салідарнасці «Разам» пры падтрыманні фонду Паўла Латушкі.
Больш інфармацыі пра падзею апублікавана на Facebook. Фонд «BYSOL» зладзіў збор грошай на арганізацыю.
Сцяпан Кубік belsat.eu
