Намеснік міністра абароны Польшчы Павэл Бэйда растлумачыў, чаму суседняя краіна пастанавіла выйсці з Атаўскай канвенцыі, што забараняе супрацьпяхотныя міны, і не выключыў, што мяжа з Беларуссю, а таксама з Расеяй будзе замінаваная.
18 сакавіка міністры абароны Эстоніі, Латвіі, Літвы і Польшчы выпусцілі супольную заяву пра выхад гэтых краінаў з Атаўскай канвенцыі. Яна прадугледжвае адмову ад выкарыстання супрацьпяхотных мінаў, спыненне іх вытворчасці і знішчэнне запасаў.
Літва далучылася да гэтай дамовы ў 2003 годзе, у наступным годзе – Эстонія, у 2005-м – Латвія. Польшча ратыфікавала ў 2021-м.
З тых часоў, як адзначаецца ў заяве міністраў абароны, «сітуацыя з бяспекаю ў нашым рэгіёне істотна пагоршылася»:
«Вайсковыя пагрозы ў дачыненні краінаў – чальцоў NATO, што мяжуюць з Расеяй і Беларуссю, істотна выраслі. З увагі на такую нестабільную сітуацыю ў сферы бяспекі, звязанай з агрэсіяй Расеі і сталай пагрозаю, што яна ўяўляе для еўраатлантычнай супольнасці, надзвычай важна вызначыць усе захады, што могуць быць скарыстаныя дзеля ўмацавання нашага патэнцыялу стрымлівання і абароны».
Кіраўнікі Мінабароны чатырох краінаў пастанавілі, што дазвол на выкарыстанне супрацьпяхотных мінаў дасць узброеным сілам «гнуткасць і магчымасць выбару» для ўмацавання абароны.
«Нашая пастанова дасылае выразны сігнал: нашыя краіны гатовыя і здольныя выкарыстоўваць любыя сродкі, неабходныя для аховы нашай тэрыторыі і свабоды», – падкрэслілі міністры.
У эфіры польскага радыё RMF FM намеснік кіраўніка Мінабароны Польшчы Павэл Бэйда заявіў, што краінам рэгіёну «не пакінулі выбару»:
,,«Сітуацыя на мяжы сур'ёзная. Я кажу пра польска-беларускую і польска-расейскую мяжу. Беларусь на павадку ў Расеі: што скажа Пуцін, на тое і пагодзіцца Лукашэнка. Звярніце ўвагу, з якога кірунку была атакаваная Украіна. З боку Беларусі».
Чыноўнік паведаміў таксама, што цяпер Польшча не мае супрацьпяхотных мінаў, але краіна здольная іх выпускаць. Ён не выключыў, што такіх мінаў будзе выраблена некалькі соцень тысячаў або нават мільён.
Сцяпан Кубік belsat.eu
