Радыё «Свабода» звярнулася ў суд у Вашынгтоне, каб аднавіць фінансаванне, ухваленае Кангрэсам. Пазоў падалі супраць Агенцтва ЗША ў справе глабальных медыяў і двух прадстаўнікоў гэтай установы.
Радыё «Свабода» (RFE/RL) падала пазоў у Акруговы суд у Вашынгтоне на Агенцтва ЗША ў справе глабальных медыяў (USAGM), што апекуецца выданнем, а таксама «Голасам Амерыкі» ды іншымі рэдакцыямі. Асобна ў заяве згадваюцца двое прадстаўнікоў Агенцтва: Кэры Лэйк і Віктар Маралес.
Нагодаю сталася скасаванне гранта Кангрэсу ЗША, паводле якога фінансуецца RFE/RL. У пазове пазначана, што гэта парушае федэральныя законы і Канстытуцыю. Адмова ў грашах, якія ўжо выдаткаваў парламент, пярэчыць Канстытуцыі, якая надзяляе яго выключным правам вызначаць федэральныя выдаткі, перадае беларуская служба радыё «Свабода».
Медыя таксама публікуе каментар кіраўніка RFE/RL Стывэна Капуса:
,,«Цяпер не час саступаць тэрыторыю прапагандзе і цэнзуры з боку праціўнікаў Амерыкі. Мы думаем, што закон на нашым баку і святкаванне нашай смерці дэспатамі ўва ўсім свеце заўчаснае».
14 сакавіка прэзідэнт ЗША Доналд Трамп падпісаў указ, скіраваны на скарачэнне сямі федэральных агенцтваў, у тым ліку Агенцтва ў справе глабальных медыяў.
Пасля гэтага ўстанова паведаміла пра спыненне фінансавання радыё «Свабода», адпаведны ліст падпісала прадстаўніца USAGM Кэры Лэйк.
Пад пагрозаю закрыцця аказалася і тэлерадыёкампанія «Голас Амерыкі». Раней стала вядома, што амаль усіх работнікаў адправілі ў вымушаны адпачынак.
«Упершыню за 83 гады легендарны "Голас Амерыкі" замаўкае. Сённяшнія дзеянні не дазволяць "Голасу Амерыкі" выканаць сваёй жыццёва важнай місіі. Гэтая місія асабліва важная сёння, калі супернікі Амерыкі – Іран, Кітай і Расея – выдаткоўваюць мільярды долараў на стварэнне хлуслівых наратываў дзеля дыскрэдытацыі Злучаных Штатаў», – заявіў тады дырэктар кампаніі Майкл Абрамавіц.
Сцяпан Кубік belsat.eu
