Масавыя палітычныя рэпрэсіі ў Беларусі не спыняюцца без малага пяць гадоў. Сілавікі ўсё менш хваляцца затрыманнямі, але ўсё роўна штодня з’яўляюцца навіны пра новыя суды і рэпрэсіі ў розных формах. «Белсат» расказвае, што стала вядома 18 сакавіка.
У Менску затрымалі расейскага стэндап-коміка Арцемія Астаніна, піша праваабарончы цэнтр «Вясна» са спасылкаю на праўладныя каналы. Астанін жартаваў пра адзін з расейскіх рэгіёнаў, дзе маці вайскоўцаў, загінулых у час нападу на Украіну, атрымалі ў падарунак мясарубкі, і лукашэнкаўскія сілавікі сфатаграфавалі яго з прычэпленаю на шыю мясарубкаю. Чаму вінаваты комік, які высмейваў недарэчны падарунак расейскіх чыноўнікаў, а не ўласна расейскія чыноўнікі, якія зрабілі падарунак, або вайсковае начальства, якое вядзе вайну «мяснымі штурмамі», сілавікі не паведамілі.
18 сакавіка стала вядома пра смерць 41-гадовага Аляксея Аўсюкевіча, асуджанага на «хатнюю хімію» (абмежаванне волі без скіравання ў папраўчую ўстанову) за нібыта абразу Лукашэнкі. Паводле «Нашай нівы», прычынаю смерці пазначаныя «іншыя неўдакладненыя прычыны». Невядома, адбываў мужчына пакаранне на момант смерці ці яно ўжо скончылася.
Былая рэдактарка «Новага часу» Аксана Колб атрымала позву ў суд Валожынскага раёну: ёй збіраюцца замяніць пакаранне — з «хіміі» на больш строгае, паведамляе Беларуская асацыяцыя журналістаў. У 2022 годзе журналістку асудзілі на «хімію» за нібыта грубае парушэнне парадку, часова вызвалілі з залы суда – і яна пакінула Беларусь.
Міжнародны камітэт расследавання катаванняў у Беларусі апублікаваў даклад «„Сардэчна запрашаем у гестапа“: катавальня ГУБАЗіКу ў асобах». У ім расказалі пра трох сілавікоў, датычных да катаванняў: гэта Аляксандр Алёкса, Валерый Высоцкі і Іван Тарасік. І апісалі злачынствы, якія чынілі на іхны загад супраць затрыманых і зняволеных.
У «спіс тэрарыстаў» дадалі 12 асобаў, сярод іх – кіраўнік ліквідаванай Беларускай партыі «Зялёныя» Дзмітрый Кучук. Цяпер у спісе 1259 чалавек, з іх больш як 550 – беларусы. А ў спіс «экстрэмісцкіх матэрыялаў» дадалі сярод іншага папулярны Telegram-чат «Таксисты Бреста», старонкі гарадзенскага блогу «S13» на TikTok і YouTube, старонку ў X Марыі Калеснікавай ды Instagram Вольгі Карач.
Алесь Наваборскі belsat.eu
