Летась «Белсат» звярнуў увагу на дарагі гадзіннік Франка Вячоркі. Пасля розгаласу галоўны дарадца абранай прэзідэнткі пастанавіў аддаць аксесуар на дабрачыннасць, каб прадаць яго на аўкцыёне, але гэтага дасюль не адбылося. Вячорка сказаў «Белсату», што «аўкцыёнамі не займаецца», а гадзіннік цяпер «у сейфе ў бяспецы».
«Мне яго падараваў чалавек, які вельмі шмат спрычыніўся да беларускай справы, займаўся і да 2020 года, і пасля 2020-га адраджэннем беларускіх мясцінаў. Многія яго ведаюць таксама. Ну ён, пабачыўшы, напэўна, што ў мяне няма гадзінніка, проста зняў свой з рукі і сказаў: вось табе, каб хутчэй вярнуцца ў Беларусь», – расказаў Франак Вячорка «Белсату» летась у сакавіку.
Кошт гадзінніка «Omega», што падарылі палітыку, можа дасягаць $ 9200. Пасля розгаласу Вячорка пастанавіў аддаць хранограф на аўкцыён «на патрэбы ваяроў ці палітвязняў».
Летась у жніўні галоўны дарадца Святланы Ціханоўскай паведаміў, што «гадзіннік пайшоў на дабрачынную ініцыятыву, будзе марафон салідарнасці, і там будуць адбывацца аўкцыёны ў падтрыманне палітычных вязняў у Беларусі, і, думаю, там будзе разыграны гадзіннік».
Другі марафон салідарнасці меўся адбыцца ў кастрычніку, аднак яго адклалі на нявызначаны тэрмін. Такім чынам, і гадзіннік Вячоркі не пайшоў з малатка.
«Я не займаюся гэтым. Я яго перадаў даўным-даўно. Гадзіннік у бяспецы, ляжыць у сейфе з іншымі лотамі. Чакае на аўкцыён», – сказаў «Белсату» палітык.
Ён не раскрыў, дзе той сейф і хто мае да яго доступ, назваўшы гэта сэнсітыўнай інфармацыяй.
Актывістка Наста Базар, якая займалася арганізацыяй марафону, што не адбыўся летась, удакладніла для «Белсату», што «з Франкам была вусная згода, што, калі будзе марафон з аўкцыёнам, ён выставіць свой гадзіннік»:
,,«Гэтага гадзінніка я ніколі не трымала ў руках. Ніводную рэч для аўкцыёну мы не планавалі фізічна мець. Ідэя была ў тым, каб людзі самі выстаўлялі і перадавалі пакупнікам».
Колішняя прадстаўніца Аб'яднанага пераходнага кабінету ў сацыяльнай палітыцы Вольга Гарбунова, адказная на той пасадзе за марафон салідарнасці, запэўніла карэспандэнта «Белсату», што перадаванне лотаў арганізатарам акцыі нават не абмяркоўвалася:
«Паводле нашых дамоўленасцяў, асобы, якія падтрымалі марафон аўкцыёнам, мусілі самыя гэта арганізаваць у сваіх акаўнтах у сацсетках. Такая дамоўленасць была і з Франкам. Шкада, што нічога не атрымалася зрабіць».
Вячорка на гэта адказаў, што «аўкцыёнамі не займаецца»:
,,«Я аўкцыёнамі не займаюся. Я аддаў на марафон, хай робяць што палічаць патрэбным. Гадзіннік чакае аўкцыёну ці марафону. Калі нейкая ініцыятыва гатовая арганізаваць такі аўкцыён на падтрыманне палітвязняў, я толькі падтрымаю».
Дарадца Ціханоўскай запэўніў, што для дабрачыннага аўкцыёну падрыхтавалі не толькі ягоны хранограф.
«Людзі з Офісу і Кабінету сабралі рэчы для марафону, але марафон і аўкцыён пакуль так і не адбыўся. Таму рэчы ляжаць і чакаюць моманту», – падсумаваў Франак Вячорка.
Сцяпан Кубік belsat.eu
