Аляксандр Лукашэнка 18 сакавіка прыняў з дакладам прэм'ер-міністра Беларусі Аляксандра Турчына і міністра замежных справаў Максіма Рыжанкова. Галоўнаю тэмаю абедзвюх сустрэчаў была эканоміка.
Аляксандр Лукашэнка расказаў, што абгаварыў падчас візіту ў Расею ўсе пытанні адносна нафты і газу, «якія трэба было, і сам-насам, і ў шырокім складзе, асабліва ў шырокім». Паводле яго, былі дадзеныя «даручэнні там жа, каб з гэтым разабраліся». Таксама Уладзімір Пуцін даў указанні кіраўніку кампаніі «Роснефть» Ігару Сечыну адносна перапрацоўвання нафты, «трэба проста дапрацаваць гэтыя пытанні» і «выпрацаваць формулу цэнаўтварэння», сказаў кіраўнік Беларусі.
Таксама Лукашэнка даручыў віцэ-прэем’еру «на ўсю катушку падключаць» пасольства для рэалізацыі планаў беларуска-расейскай супрацы. Ён падкрэсліў, што «ў Расею ў нас таварны экспарт ніжэйшы за мінулы год».
,,«Гэта насцярожвае вельмі сурʼёзна», – сказаў Лукашэнка.
Аляксандр Турчын адзначыў, што яго таксама «вельмі турбуе» таварны экспарт у Расею, асабліва прадукцыі машынабудавання. Ён патлумачыў гэта сітуацыяй у Расеі і высокімі адсоткавымі стаўкамі там. І заявіў пра неабходнасць дыверсіфікацыі экспарту.
На сустрэчы з Максімам Рыжанковым Лукашэнка заявіў пра неабходнасць прапрацоўкі ягоных «вельмі важных» візітаў у шэраг азіяцкіх краінаў, рэалізацыю дарожных мапаў супрацы, у тым ліку з Кітаем, рыхтаванне да правядзення саміту Еўразійскага эканамічнага саюзу і рыхтаванне нарады з беларускімі пасламі. Паводле яго, пытанне нумар адзін – гэта справаздача МЗС і паслоў у пытаннях вонкаваэканамічнай дзейнасці.
Сам Рыжанкоў паводле вынікаў сустрэчы расказаў БелТА, што таксама «быў абмеркаваны шэраг пытанняў у рэалізацыі нейкіх нашых крокаў і крокаў нашых партнёраў для аднаўлення даверу ў стасунках» з шэрагам заходніх дзяржаваў. Якія менавіта пытанні абмяркоўваліся ў гэтым кантэксце і адносна якіх краінаў, ён не ўдакладніў.
Беларуская дэмакратычная лідарка Святлана Ціханоўская наведвае з працоўным візітам Брусель. Раніцай 18 сакавіка яна ўзяла ўдзел у сустрэчы міністраў Еўразвязу ў еўрапейскіх справах. Беларуская лідарка заклікала міністраў да актыўных дзеянняў, каб вывесці Беларусь з палітычнага крызісу.
Якуб Хруст belsat.eu
