Беларуская дэмакратычная лідарка Святлана Ціханоўская наведвае з працоўным візітам Брусель. Раніцай 18 сакавіка яна ўзяла ўдзел у сустрэчы міністраў Еўразвязу ў еўрапейскіх справах. Беларуская лідарка заклікала міністраў да актыўных дзеянняў, каб вывесці Беларусь з палітычнага крызісу.
«Пакуль Лукашэнка ва ўладзе, Еўрапейскаму Звязу будзе ўвесь час пагражаць небяспека. Толькі за апошнія выходныя мы ўбачылі сотні новых спробаў пераходу межаў нелегальнымі мігрантамі: з Польшчай, Літвой і Латвіяй. Гэта не проста пагроза. Гэта шантаж. Беларусь паказвае, што дэмакратыя і бяспека ўзаемазвязаныя: калі ўрад не паважае свой народ – ён не будзе паважаць і сваіх суседзяў. Але мы хочам, каб Беларусь была такою ж бяспечнаю, як і ЕЗ. А гэта магчыма толькі тады, калі яна стане дэмакратычнаю. Дэмакратычныя перамены ў Беларусі гарантуюць 1000 кіламетраў бяспечнай мяжы: без нападу мігрантаў і сталага страху вайны», – сказала Святлана Ціханоўская.
Каб наблізіць гэта, яна прапанавала тры практычныя крокі:
- працягваць ціск на рэжым Аляксандра Лукашэнкі, пакуль у краіне існуюць рэпрэсіі, а палітвязні застаюцца ў няволі. Яна настойліва прапанавала міністрам падтрымаць перадачу Літвою справы супраць рэжыму ў Міжнародны крымінальны суд у Гаазе;
- узмацніць падтрыманне грамадзянскай супольнасці і дэмакратычных ініцыятываў, тэрмінова кампенсаваць скарачэнне амерыканскай дапамогі, каб захаваць беларускія незалежныя медыі;
- забяспечыць выдачу візаў і прававы статус для беларусаў, знайсці комплексны развязак для праблемаў тысячаў беларусаў у ЕЗ, якія не могуць падоўжыць тэрмін дзеяння пашпартоў або вярнуцца дадому.
Ціханоўская 11–12 сакавіка была з візітам у Страсбуры. Там яна выступіла ў Еўрапарламенце, дзе яе слухалі сем сотняў дэпутатаў з усіх краінаў Еўразвязу, у Радзе Еўропы, дзе рэпрэзентаваныя 46 краінаў, і сустрэлася з прэзідэнткай і віцэ-прэзідэнтамі Еўрапарламенту, дэлегацыяй у сувязях з Беларуссю.
Якуб Хруст belsat.eu
