У польскіх Катавіцах адбыўся напад на беларускага мастака, рэжысёра і ілюстратара Аляксандра Канавалава. Пра гэта ён сам паведаміў у Facebook 18 сакавіка.
Мастак адзначыў, што вяртаўся ў гатэль з канцэрту гурта «Kaliber 44» у горадзе Катавіцэ, калі атрымаў нечаканы ўдар. Ён паведаміў, што нічога не памятае, але ў яго дзве зламаныя сківіцы, пашкоджанае вуха, выбітыя тры пярэднія зубы.
«Я аб'ездзіў паўсвету, і ўсё ж менавіта тут са мной здарылася такая прыгода», – сказаў Аляксандр Канавалаў, дадаўшы, што «варта працягваць любіць свет».
Аляксандр (Саша) Канавалаў – польскі мастак, рэжысёр і ілюстратар беларускага паходжання. Лаўрэат розных прэміяў і арганізатар шматлікіх выставаў. Працаваў у тым ліку над польскім мультсерыялам «Kajko i Kokosz» (2021 год), мультфільмам «Elo złomy» (2022).
Нагадаем, што каля польскага Гданьску невядомыя спалілі дом-прычэп беларускага актывіста Алега Мядзведзева, які дапамагаў бесхацінцам.
Якуб Хруст belsat.eu
