Валавы ўнутраны прадукт Беларусі ў студзені – лютым 2025 года склаў 38,7 млрд рублёў. Пра гэта сведчаць звесткі Нацыянальнага статыстычнага камітэту.
ВУП вырас на 3,1 % у супастаўных цэнах у параўнанні з аналагічным леташнім перыядам. Пры гэтым тэмпы росту эканомікі замарудзіліся на 0, 6 адсоткавага пункта, бо ў студзені ВУП вырас на 3,7 %. Прагноз жа ўраду прадугледжвае рост эканомікі ў 2025 годзе на 4,1 %.
У студзені – лютым аб'ём прамысловай вытворчасці ў бягучых цэнах склаў 33,3 млрд рублёў, павялічыўшыся на 2 % да студзеня – лютага 2024 года. Горназдабыўная прамысловасць вырасла на 0,9 %, апрацоўчая – на 2,6 %, водазабеспячэнне, збор, апрацаванне і выдаленне адходаў, дзейнасць у ліквідацыі забруджанняў – на 0,1 %, а забеспячэнне электраэнергіяй, газам, парай, гарачай вадой і кандыцыянаваным паветрам скарацілася на 0,7 %.
Пасажыраабарот склаў 3721,9 млн пасажыра-кіламетраў, павялічыўшыся на 6,8 %. Паслугамі пасажырскага транспарту скарысталіся 272,5 млн асобаў (рост на 1 %).
Грузаабарот склаў 10,8 млрд тона-кіламетраў, паменшыўшыся на 2,7 %.
Раздробны таваразварот склаў 14,3 млрд рублёў. Ён павялічыўся на 10 % у супастаўных цэнах. А вось гуртавы тавараабарот скараціўся на 1,8 %, склаўшы 27,7 млрд рублёў. Тавараабарот грамадскага харчавання склаў 999,1 млн рублёў, вырасшы на 3,6 %.
У студзені – лютым 2025 года ў гаспадарках усіх катэгорыяў вытворчасць прадукцыі сельскай гаспадаркі ў бягучых цэнах склала 3490,9 млн рублёў і павялічылася ў параўнанні са студзенем – лютым 2024 года ў супастаўных цэнах на 1,2 %.
Якуб Хруст belsat.eu
