Прэзідэнт ЗША Доналд Трамп заявіў, што ў аўторак, 18 сакавіка, правядзе перамовы з Уладзімірам Пуціным. Падчас размовы будзе абмяркоўвацца магчымасць спынення вайны ва Украіне.
Размова паміж прэзідэнтамі Злучаных Штатаў і Расейскай Федэрацыі будзе адбывацца на фоне «пазітыўных перамоваў» паміж афіцыйнымі асобамі ЗША і Расеі ў Маскве, паведамляе «Reuters».
Падчас размовы з журналістамі Трамп адзначыў, што ёсць добры шанец для таго, каб пакласці канец вайне.
,,«Мы хочам паглядзець, ці зможам мы пакласці канец гэтай вайне. Магчыма, мы зможам, а можа, не зможам, але я думаю, што ў нас ёсць вельмі добры шанец», – сказаў Трамп.
На пытанне пра тое, якія саступкі разглядаюцца на перамовах аб спыненні агню, Трамп сказаў: «Мы будзем размаўляць пра зямлю. Мы будзем размаўляць пра электрастанцыі».
«Я думаю, што ў нас шмат што ўжо абмяркоўвалася абодвума бакамі, Украінай і Расеяй. Мы ўжо гаворым пра гэта, дзелім пэўныя актывы», – заявіў амерыканскі прэзідэнт.
Нагадаем, падчас перамоваў з Украінай у Джыдзе 11 сакавіка ЗША прапанавалі 30-дзённае спыненне агню. Уладзімір Зяленскі пацвердзіў гатовасць да замірэння, калі на гэта пагодзіцца РФ. 13 сакавіка сталася вядома, што спецпасланнік Доналда Трампа Стыў Ўіткаф ужо правёў перамовы ў Расеі.
Да гэтага падчас супольнай прэс-канферэнцыі з Аляксандрам Лукашэнкам Уладзімір Пуцін сказаў, што ён выступае за трывалы мір, але не супраць і прапановы ЗША, толькі пры гэтым сфармуляваў некалькі пытанняў, якія замінаюць такому сцэнару. Адно з іх датычыць лёсу ўкраінскіх вайскоўцаў, якія нібыта застаюцца на тэрыторыі Курскай вобласці ў Расеі і блізкія да акружэння. Пуцін прапанаваў, каб яны здаваліся ў палон. У той жа час кіраўніцтва Украіны адмаўляе акружэнне сваіх вайскоўцаў у Курскай вобласці.
Кіраўнік Расеі таксама сказаў, што не разумее, як забяспечыць маніторынг выканання замірэння на ўсёй лініі фронту, якая мае працягласць больш за 2000 кіламетраў.
Раман Шавель belsat.eu
