Гэтая размова адбылася ў 2021 годзе. Салігорскія міліцыянты намагаліся злавіць аўтара пратэсных графіці і абмяркоўвалі, як гэта можна зрабіць з дапамогаю звестак вышкі мабільнай сувязі.
Пра пошук «злачынцы» размаўлялі намеснік начальніка крымінальнай міліцыі УУС Менаблвыканкаму Ігар Качалаў і тагачасны намеснік кіраўніка Салігорскага РАУС Вадзім Канапацкі, цяпер ён узначальвае Бярэзінскі РАУС.
Канапацкі скардзіцца, што ніяк не можа знайсці аўтара пратэсных малюнкаў, якія з'яўляліся ў адным і тым жа месцы. Міліцыянт нават выстаўляў фотапасткі, што павінны былі зафіксаваць актывіста, аднак на патрабаванне калегаў іх давялося вярнуць, і пасля гэтага выявілі новы малюнак. «Так крыўдна, б****. Зноў там "Лука", "фашызм", свастыка», – наракаў Канапацкі.
Ён расказаў, што ў пошуках актывіста ў вёсцы Памесце (фармальна гэта мікрараён Салігорску побач са Старобінам) сілавікі гэтае паселішча «цалкам тэрарызуюць, лупяць ператрусы». Людзей «прабівалі» ў некалькіх базах: сістэме «Беспарадкі», куды залучаюць усіх затрыманых за палітыку, і «Маяк», што дазваляе даведацца нумары тэлефонаў, падлучаных да канкрэтнай вышкі сотавай сувязі.
Качалаў загадаў падначаленаму зачапіцца менавіта за «Маяк», каб паспрабаваць выявіць тэлефон, які тры разы быў заўважаны каля месца з'яўлення графіці:
«Мы маем тры канкрэтныя даты. Давай, няхай будзе вялікі аб'ём, аднак усё адно гэтую працу трэба пачынаць. Яшчэ ў нас нічога няма пакуль, гэта адзінае, за што можна зачапіцца. З трох дзён мы выкінем усё, пакінем толькі тэлефоны, што тры разы трапілі ў гэтую соту».
У сувязі з гэтай размоваю «Кіберпартызаны» нагадалі, што ўключаны мабільны тэлефон заўсёды падлучаецца да базавай станцыі, і ў момант падлучэння вышка фіксуе нумар. Такім чынам, сілавікі могуць вызначыць, ці быў уладальнік тэлефону ў вызначаны час у пэўным месце. Аднак дакладныя каардынаты застаюцца невядомымі, бо радыус дзеяння базавай станцыі можа дасягаць 50 км.
Задача выявіць асобу ўскладняецца, калі сілавікам даводзіцца шукаць у людным месцы, дзе да сотавай вышкі падлучаецца багата тэлефонаў.
Сцяпан Кубік belsat.eu
