Беларусь трапіла ў спіс краінаў, грамадзянам якіх Злучаныя Штаты Амерыкі намераныя абмежаваць уезд.
Адміністрацыя Доналда Трампа разглядае новае абмежаванне на ўезд у ЗША для грамадзянаў 43 краінаў, паведамляе «The New York Times». Паводле чарнавіка дакументу, які распрацавалі дыпламаты і сілавыя структуры, краіны падзеленыя на тры катэгорыі: чырвоны, аранжавы і жоўты спісы, у залежнасці ад узроўню меркаваных пагрозаў і недахопаў у сістэме бяспекі гэтых дзяржаваў.
У чырвоным спісе краіны, для якіх прадугледжаная поўная забарона на ўезд у ЗША незалежна ад мэты візіту. Гэта Афганістан, Бутан, Куба, Іран, Лівія, Паўночная Карэя, Самалі, Судан, Сірыя, Венесуэла, Емен.
Аранжавы спіс азначае частковае абмежаванне ўезду. Менавіта ў гэты спіс уваходзіць і Беларусь. Усяго ў ім 10 краінаў: Беларусь, Эрытрэя, Гаіці, Лаос, М’янма, Пакістан, Расея, Сьера-Леонэ, Паўднёвы Судан, Туркменістан.
Грамадзяне гэтых краінаў не будуць мець поўнай забароны, але сутыкнуцца з сур’ёзнымі абмежаваннямі. Звычайныя турыстычныя і іміграцыйныя візы будуць недаступныя, але могуць быць зробленыя выключэнні для заможных бізнесоўцаў. Акрамя таго, усім заяўнікам давядзецца праходзіць абавязковыя асабістыя суразмовы пры падачы дакументаў.
Гэта значыць, што Беларусь апынулася ў адным спісе з Расеяй, а таксама з дзяржавамі, якія часта разглядаюцца як праблемныя ў сферы бяспекі і правоў чалавека.
У жоўтым спісе пералічваюцца 22 дзяржавы. Іх грамадзянам пакуль не пагражае забарона на ўезд, але іх урадам дадуць 60 дзён на выпраўленне недахопаў у сістэме бяспекі (напрыклад, паляпшэнне абмену інфармацыяй з ЗША, больш строгія правілы выдачы пашпартоў і г. д.). Калі гэтага не будзе зроблена, краіна можа трапіць у адзін з больш жорсткіх спісаў. Сярод краінаў у гэтым спісе фігуруюць Ангола, Камерун, Малі, Зімбабвэ, Вануату і іншыя.
Паводле ананімных чыноўнікаў у Дзяржаўным дэпартаменце ЗША, гэты спіс быў складзены некалькі тыдняў таму, але да яго зацвярджэння могуць быць зробленыя некаторыя змены. Канчатковую пастанову будзе прымаць Белы дом, і чакаецца, што дакумент будзе разгледжаны ўжо на наступным тыдні.
Раман Шавель belsat.eu
