У Чачэрску пачаўся суд за «масавыя беспарадкі», МУС абнавіла «спіс экстрэмістаў», а дэпутаты Еўрапарламенту падпісалі паштоўкі беларускім палітвязням. «Белсат» працягвае натаваць факты рэпрэсіяў, што не спыняюцца ў нашай краіне з 2020 года.
У Чачэрску пачаўся разгляд справы мясцовага жыхара Рамана Емяльянава, якога абвінавачваюць у «масавых беспарадках». Якое менавіта «злачынства» ўчыніў маладзён, невядома. Праваабарончы цэнтр «Вясна» паведамляе, што працэс вядзе суддзя Мікалай Сергіевіч. Летась ён судзіў хлопца за «несанкцыянаванае пікетаванне».
Вярхоўны суд 14 сакавіка разгледзеў апеляцыйную скаргу лекаркі Алены Елькінай. Пастанову прымала судовая калегія на чале Аляксея Хлышчанкова. Праўда, вынік праваабаронцам пакуль не вядомы.
Раней суддзя Менскага гарадскога суда Алена Ананіч вынесла прысуд Елькінай паводле абвінавачвання ў «стварэнні экстрэмісцкага фармавання» і «закліках да санкцыяў», тэрмін праваабаронцы таксама пакуль не ведаюць.
Паводле КДБ, лекарка мае дачыненне да Telegram-каналу «ШапитоДичь», які сілавікі прызналі «экстрэмісцкім фармаваннем».
Лік асобаў у «спісе экстрэмістаў», што складае МУС, дасягнуў 5 051. У пералік залучылі яшчэ 28 прозвішчаў, у тым ліку віцебскага лекара Аляксандра Рандарэнку і індывідуальнага прадпрымальніка Андрэя Слізевіча. Абодва прызнаныя палітвязнямі.
Былы палітвязень памёр праз два месяцы пасля вызвалення. Ідзецца пра жыхара Ліды Валянціна Іваноўскага. Ён выйшаў на волю летась у траўні, а ў жніўні – сканаў, даведалася цяпер ініцыятыва «Dissidentby». Прычына смерці невядомая. Іваноўскі атрымаў 2 гады калоніі нібыта за абразу Лукашэнкі. Гэты тэрмін палітвязень адбыў у наваполацкай калоніі. Іваноўскаму было 48 гадоў.
846 паштовак для беларускіх палітвязняў падпісалі дэпутаты Еўрапейскага парламенту. Гэта максімум ад пачатку ініцыятывы #EPStandsBYyou у 2022 годзе. Акцыю салідарнасці з палітычнымі зняволенымі падтрымалі палітыкі з усіх камітэтаў і палітычных групаў у Страсбуры.
Сцяпан Кубік belsat.eu
