Старшыню Савету Рэспублікі спыталі пра павышэнне пенсійнага ўзросту падчас яе візіту на завод у Наваполацку. Пра тое, што ўлады плануюць непапулярную захаду, раней паведамілі крыніцы «Белсату».
Старшыня верхняй палаты парламенту 14 сакавіка наведала Наваполацкі завод тэхналагічных металаканструкцыяў і адказала на пытанні работнікаў. У Наталлі Качанавай пацікавіліся, ці будуць павышаць узрост выхаду на пенсію.
«Цвёрды адказ Наталлі Качанавай пра тое, што ў бліжэйшай перспектыве павелічэння пенсійнага ўзросту не плануецца, выклікаў станоўчыя эмоцыі ў завадчанаў», – адрапартаваў Telegram-канал Савету Рэспублікі.
На мінулым тыдні «Белсат» са спасылкаю на крыніцы паведамляў, што ўлады плануюць у два этапы – у 2026 і 2027 гадах – падняць пенсійны ўзрост, каб для жанчын ён быў 60 гадоў, а для мужчын – 65. Праект адпаведнага дакументу гатовы, аднак яшчэ не ўхвалены.
Да 2017 года жанчыны ў Беларусі выходзілі на пенсію ў 55 гадоў, мужчыны – у 60. Пасля паэтапнага павышэння, згодна з указам Аляксандра Лукашэнкі, пенсійны ўзрост для жанчын павялічыўся да 58 гадоў, а для мужчын – да 63.
Эканамістка даследчага цэнтру BEROC Настасся Лузгіна раней у каментары «Белсату» адзначала, што гэтая непапулярная захада толькі адкладае, але не развязвае праблемы з выплатамі пенсій:
«Сённяшнія работнікі забяспечваюць прыбытак сённяшнім пенсіянерам. А людзей у эканоміцы менее з увагі на дэмаграфічную праблему і міграцыйныя трэнды. Таму, імаверна, і разглядаецца павышэнне пенсійнага ўзросту. Аднак гэтая захада не развязвае праблему. Дзеля эфектыўнасці пенсійнай сістэмы патрабуецца рэфармаванне з увядзеннем абавязковага назапашвальнага элементу, калі частка сацыяльных адлічэнняў ідзе на асабісты рахунак работніка».
З гэтым рэфармаваннем, паводле эксперткі, улады спазніліся гадоў на 10–15. З улікам глабальнасці праблемы Беларусь не дасць рады з гэтым без вонкавай дапамогі, а статус суагрэсара ў вайне супраць Украіны паставіў крыж на супрацы з міжнароднымі арганізацыямі, якія маглі б фінансава падтрымаць рэформу.
Сцяпан Кубік belsat.eu
