Абраная прэзідэнтка Беларусі сустрэлася з Ксеніяй Луцкіной. Святлана Ціханоўская назвала гісторыю журналісткі «прыкладам незвычайнай сілы», адзначыўшы, што Ксенія пераадолела ўсе цяжкасці, нягледзячы на ціск.
«Рэжым рабіў усё, каб зламаць Ксенію – не толькі праз прысуд, але і праз адсутнасць медычнай дапамогі, што руйнавала яе здароўе. Нягледзячы на ціск, Ксенія вытрымала», – цытуе Святлану Ціханоўскую яе Telegram-канал.
Абраная прэзідэнтка цешыцца, што Ксенія Луцкіна цяпер на волі, бо «самае каштоўнае для чалавека – гэта жыццё і свабода».
«Цяпер важна дапамагчы Ксеніі аднавіцца і разам працягваць барацьбу за тых, хто ўсё яшчэ за кратамі», – адзначыла Ціханоўская.
Яна сустрэлася з журналісткаю 14 сакавіка ў Вільні.
Падчас мірнай рэвалюцыі 2020 года Луцкіна, якая працавала ў Белтэлерадыёкампаніі, выступіла супраць гвалту. Журналістку затрымалі ў снежні таго ж года. У верасні 2022-га суддзя Менскага гарадскога суда Таццяна Фалькоўская прызначыла Луцкіной 8 гадоў калоніі нібыта за змову з мэтаю захопу ўлады неканстытуцыйным шляхам.
Летась у жніўні журналістку вызвалілі паводле памілавання, і цяпер, на пачатку сакавіка, яна выехала з Беларусі.
Фонд «BYSOL» ладзіў збор для падтрымання Луцкіной, неабходныя на першы час 7000 еўраў сабралі за два дні.
У эфіры «Белсату» журналістка згадвала, што ў дзень ад'езду з Беларусі пачувалася парадаксальна і не надта прыемна: адчула сябе ўпершыню вольнаю, хоць амаль паўгода была не за кратамі:
«Я сябе адчула, нібы я ўчора выйшла, калі ступіла [на зямлю] у іншай краіне. У чужой краіне ты становішся – і табе кажуць: "Усё добра, далей усё будзе добра". А ты разумееш, што гэта жудасная рэч, што табе трэба з’язджаць з Радзімы, і вольным ты сябе адчуваеш у іншай краіне».
Першы час па пераездзе Луцкіна плануе займацца здароўем. Расказала, што яшчэ ў Беларусі рабіла абследаванні па вызваленні, частка пытанняў развязаная, стан стабілізаваны, але трэба змагацца з «глабальнай праблемай»:
«Па-першае, я хачу жыць! Я ўжо жыву. І хачу жыць такім поўным жыццём, свабодным. Цяпер я магу не фільтраваць, што я каму кажу. Гэта ўжо свабода. І я вельмі хачу працаваць, застацца ў прафесіі, наколькі гэта будзе магчыма».
Сцяпан Кубік belsat.eu
