Савет Федэрацыі Расеі падчас пленарнага паседжання 14 сакавіка ўхваліў законапраект аб ратыфікацыі пагаднення і пратаколу, якімі прадугледжваецца адтэрмінаванне плацяжоў па дзяржаўных крэдытах для Беларусі.
Ініцыятыва была ўнесеная на ратыфікацыю ў Дзярждуму ў канцы студзеня 2025 года. Падпісанае ж пагадненне было ў Маскве 25 красавіка 2024-га. 11 ліпеня 2024 года падпісалі пратакол, які змяняе згаданае пагадненне.
Пагашэнне беларускім бокам асноўнай запазычанасці з 1 красавіка да 31 снежня 2024 года і адсоткавых плацяжоў з 1 ліпеня да 31 снежня 2024 года пераносіцца на 2031–2036 гады, паведаміў намеснік старшыні Камітэту Савету Федэрацыі ў міжнародных справах Андрэй Клімаў.
Адтэрмінаванне плацяжоў ухвалілі перад выступам Аляксандра Лукашэнкі ў расейскім парламенце 14 сакавіка. Агульная сума складае каля $ 800 млн.
У каментары «DW» акадэмічны дырэктар даследчага цэнтру BEROC Леў Львоўскі адзначаў, што невядома, «чым Беларусь павінна будзе заплаціць за такую шчодрасць Масквы».
«За апошнія гады ўсе новыя крэдыты і адтэрмінаванніі, якія Беларусь атрымлівае ад Расеі, падпісваюць за зачыненымі дзвярыма, мы нават не ведаем, пад які адсотак былі выдзеленыя сродкі», – казаў эканаміст.
Паводле Паўла Латушкі, Лукашэнка расплачваецца з Расеяй ваенным суверэнітэтам Беларусі.
Паводле ацэнак Сусветнага банку, на пачатак 2023 года Беларусь была найбуйнейшым даўжніком Расеі: на яе прыпадала $ 8,2 мільярда вылучаных Крамлём міждзяржаўных крэдытаў. Гэта больш як чвэрць агульнай сумы запазычанасці замежных дзяржаваў перад Расеяй, якую СБ ацэньваў на $ 28,9 млрд.
Марыя Міхалевіч belsat.eu
