Беларусы, якія планавалі ехаць на канцэрт Макса Каржа, што адбудзецца ў Варшаве 9 жніўня 2025 года, сутыкнуліся з цяжкасцямі ў атрыманні шэнгенскай візы. Некаторыя адмаўляюцца ад паездкі і перапрадаюць квіткі, піша «Наша Ніва».
Адмаўляюць 40 % тых, хто падаваўся на візу, каб паехаць на канцэрт. Такія звесткі вынікаюць са справаздачаў пра вынікі падачы ў адмысловым чаце, прысвечаным атрыманню візы на канцэрт.
Найчасцей адмаўляе Грэцыя ў турыстычным шэнгене, бо прэтэндэнты нібыта недастаткова абгрунтавалі мэту і ўмовы падарожжа, не даказалі наяўнасці дастатковых сродкаў на час паездкі.
Частка тых, каму адмовілі, усё ж не губляе надзеі і збіраецца падавацца на іспанскую ці італьянскую візы – гэтыя краіны найменш адмаўляюць.
Некаторыя беларусы, аднак, пастанавілі проста не ехаць на канцэрт і прадаць квіток. На «Куфры» ўжо даволі шмат прапановаў, кошты – ад 150 да 1000 рублёў. У некаторых абвестках указваецца прычына продажу – не адкрылі візы.
Канцэрт Макса Каржа адбудзецца ў Варшаве 9 жніўня 2025 года, у 5-ую гадавіну прэзідэнцкіх выбараў у Беларусі, пасля якіх пачаліся самыя масавыя ў гісторыі краіны пратэсты і рэпрэсіі.
Квіткі паступілі ў продаж 10 снежня і былі цалкам раскупленыя за 5 дзён. На адпаведных сэрвісах кошт стартаваў ад 190 злотых ($ 47) і даходзіў да 20 тысячаў злотых ($ 4954) у VIP-сектары.
Арганізатары абяцаюць «самае грандыёзнае шоу з неймавернай энергіяй» і «вечар, якога вы не забудзеце». Будуць ладзіцца аўтобусныя туры з розных гарадоў Еўропы.
Макс Корж пакінуў Беларусь у кастрычніку 2024 года пасля выкліку ў міліцыю. Выступ у Варшаве станецца ягоным першым канцэртам у Польшчы з 2019-га.
Марыя Міхалевіч belsat.eu
