Грамадзяне Беларусі, якія стала жывуць у Расеі, атрымалі права браць удзел у расейскіх мясцовых выбарах. Такое ж права працуе для расейцаў, якія жывуць у Беларусі: яны могуць галасаваць і абірацца тут.
Гэта стала магчыма пасля таго, як Аляксандр Лукашэнка і Уладзімір Пуцін падпісалі пратакол аб унясенні змяненняў у двухбаковую дамову аб роўных правах грамадзянаў за 25 снежня 1998 года. Пра гэта апавёў Пуцін падчас супольнай з Лукашэнкам прэс-канферэнцыі 13 сакавіка.
Пуцін адзначыў, што такім чынам нібыта «пашыраюцца магчымасці для больш актыўнага залучэння грамадзянаў у грамадскае і палітычнае жыццё».
«Расейцы, якія стала жывуць на тэрыторыі Беларусі, і беларусы, якія жывуць на сталай аснове ў Расеі, могуць цяпер браць удзел у мясцовых выбарах і як выбарнікі, і як кандыдаты», – сказаў Пуцін.
Арсен Рудэнка belsat.eu
