28 сакавіка ў польскіх кінатэатрах стартуе паказ фільму «Пад шэрым небам» беларускай рэжысёркі Мары Тамковіч.
Стужка прысвечаная журналістцы Кацярыне Андрэевай (Бахвалавай), якая стала адною з самых вядомых беларускіх палітзняволеных. Фільм апавядае пра ейны лёс, а таксама рэпрэсіі, што закранулі незалежных журналістаў у краіне.
Кацярыну Андрэеву, якая працавала на тэлеканале «Белсат», затрымалі ў 2020 годзе пасля стрыму з плошчы Пераменаў у Менску. Спачатку яе засудзілі на два гады калоніі, а затым – яшчэ на шэсць гадоў за «дзяржаўную здраду».
Рэжысёрка Мара Тамковіч неаднаразова звярталася да тэмы палітычных рэпрэсіяў у Беларусі. Ейная новая стужка мае на мэце прыцягнуць увагу міжнароднай супольнасці да лёсу Кацярыны Андрэевай ды іншых журналістаў, якія застаюцца за кратамі.
Надзея Вольная belsat.eu
