Рэйс Стамбул – Масква турэцкай авіякампаніі падаў сігнал бедства на мяжы з Беларуссю, але здзейсніў пасадку ў Вільні.
Як піша тэлеграм-канал «Говорит Москва», дасягнуўшы Смаленску, камандзір лайнера «Airbus A330» турэцкай авіякампаніі запытаў змену курсу і накіраваўся ў бок беларуска-літоўскай мяжы. Затым борт пачаў выпрацоўваць паліва, падаў сігнал бедства на мяжы з Беларуссю, але здзейсніў пасадку ў Вільні. У выніку пасадкі ніхто не пацярпеў.
Што дакладна здарылася з самалётам, пакуль не паведамляецца. Але вядома, што ранкам Масква і Падмаскоўе зазналі масаваную атаку беспілотнікаў. Паводле інфармацыі мэра расейскай сталіцы Сяргея Сабяніна, СПА Міністэрства абароны РФ збіла 69 дронаў, якія накіроўваліся ў бок Масквы. У выніку атакі ў Маскоўскай вобласці адна асоба загінула, яшчэ трое атрымалі раненні.
Губернатар Падмаскоўя Андрэй Вараб'ёў паведаміў, што інцыдэнты з пацярпелымі адбыліся ў Ленінскай гарадской акрузе (горад Віднае) і ў Дамадзедаве (вёска Ям).
У мэтах бяспекі часова прыпынялася праца аэрапортаў «Дамадзедава», «Шарамецьева» і «Жукоўскі».
Афіцыйных заяваў ад украінскага боку наконт гэтай атакі пакуль не паступала.
Надзея Вольная belsat.eu
