У Беларусі з'яўляецца новы агрэгатар таксі. Пра гэта расказаў начальнік упраўлення інфраструктурных рашэнняў мабільнага аператара «А1» і кіраўнік «А1 таксі» Яўген Ляўданскі.
«Мы пабачылі, што рынак таксі сапраўды вялікі. Гаворка ідзе пра абʼёмы каля 1,3 млрд рублёў на год для ўсёй Беларусі. Асноўная прычына, што не дае развіваць гэты рынак, уплываць на цэны, палягае на манаполіі – адзін буйны агрэгатар займае больш як 90 % рынку. А значыць, пара б прапанаваць альтэрнатыву», – сказаў ён у інтэрв’ю av.by.
З ягоных словаў, пастанова наконт старту праекту была прынятая восенню 2024 года. Для гэтага ўжо набылі кампанію «Баварыя», што аказвала паслугі прэміум-класу. Гэта, сказаў Яўген Ляўданскі, дало «А1» «добрыя веды пра рынак, наладжаныя бізнес-працэсы, каманду прафесіяналаў», а таксама «вялікі досвед», што дазваляе паскорыць запуск сэрвісу і не рабіць «дзіцячых» памылак.
Ён адзначыў, што цяпер адбываецца этап тэставання ўсіх сістэмаў, ідзе атрыманне неабходных дазволаў, рэгіструюцца інфармацыйныя рэсурсы і гэтак далей. Паўнавартасны запуск сэрвісу плануецца ў траўні 2025 года.
1 лістапада пачалі дзеяць новыя правілы пасажырскіх нерэгулярных перавозаў. Працаваць дазволена толькі тым, хто зарэгістраваўся ў адмысловым рэестры. Калі ж зловяць таксіста, які працуе без рэгістрацыі ў рэестры, парушэнне будуць разглядаць як «незаконную прадпрымальніцкую дзейнасць», а гэта пагражае нават канфіскацыяй аўта.
Улады неабходнасць новых правілаў абгрунтоўваюць клопатам пра бяспеку пасажыраў і жаданнем цалкам легалізаваць рынак, каб усе спраўна плацілі падаткі і не хавалі прыбытку. У выніку, паводле «Яндекс Go», у першыя дні працы рэестру колькасць кіроўцаў на лініі скарацілася ў сярэднім на 25 % у краіне і на 35 % у Менску. Пры гэтым моцна падаражэлі паездкі: у сярэднім чэк вырас у 2–2,5 разу.
Якуб Хруст belsat.eu
