Еўразійскі банк развіцця (ЕАБР) у сваім штотыднёвым макрааглядзе звярнуў увагу на запавольванне вонкавага гандлю Беларусі.
Як адзначылі ў ЕАБР, у студзені вонкавагандлёвы абарот Беларусі скараціўся на 5,1 % год да года. Асноўным фактарам было зніжэнне экспарту на 11,5 % год да года, выкліканае скарачэннем продажаў у краіны па-за СНД (менш на 21,3 % год да года).
«Экспарт у краіны СНД – ключавы рынак збыту – зменшыўся на 6,2 % г/г праз рост канкурэнцыі і зніжэнне попыту на тле высокіх адсоткавых ставак у Расеі. Пры гэтым імпарт вырас на 1 % г/г дзякуючы павелічэнню ўнутранага попыту», – адзначылі ў ЕАБР.
У выніку дэфіцыт вонкавага гандлю таварамі пашырыўся да 500 млн долараў супраць 100 млн на год раней.
Аляксандр Лукашэнка, прызначаючы новых міністраў, адразу распарадзіўся: трэба выцягнуць з заняпаду экспарт айчынных тавараў. Рэанімаваць замежны гандаль загадалі новаму віцэ-прэм'еру Віктару Каранкевічу.
«Экспарт мусіць быць не меншы за шэсць мільярдаў долараў – з пяці з паловаю адсоткаў мы павінны выйсці на ўзровень мінулага года», – заявіў Лукашэнка.
Якуб Хруст belsat.eu
