Стрыечны брат віцэ-прэзідэнта ЗША Джэй Дзі Вэнса, Нэйт Вэнс, у 2022 годзе добраахвотнікам далучыўся да Збройных сілах Украіны і 2,5 года ваяваў у складзе батальёна «Ваўкі да Вінчы».
Як паведамляе «Le Figaro», 47-гадовы былы амерыканскі марпех Нэйт Вэнс быў ва Украіне тры гады, з якіх два з паловай – на фронце. Ён удзельнічаў у баях за Купянск, Бахмут, Аўдзееўку і Пакроўск. Сышоў з украінскай арміі ён у пачатку студзеня 2025 года, незадоўга да інаўгурацыі свайго стрыечнага брата на пасадзе віцэ-прэзідэнта.
Тым не менш, добраахвотнік быў засмучаны і раззлаваны паводзінамі свайго кузэна падчас спрэчкі з прэзідэнтам Украіны Уладзімірам Зяленскім у Авальным кабінеце Белага дому 28 лютага.
«Джэй Дзі – добры, разумны хлопец. Калі ён крытыкаваў дапамогу Украіне, я думаў, што гэта таму, што ён павінен дагадзіць пэўнаму электарату, што гэта палітычная гульня. Але тое, што яны [Джэй Дзі Вэнс і Доналд Трамп. – рэд. Belsat.eu] зрабілі з Зяленскім, было засадай з абсалютнай нядобрасумленнасцю», – сказаў Нэйт Вэнс.
Ён адзначыў, што некалькі разоў спрабаваў звязацца са сваім стрыечным братам і нават пакінуў паведамленне ў офісе Вэнса, аднак адказу не атрымаў.
Віцэ-прэзідэнт ЗША Джэй Дзі Вэнс быў актыўным удзельнікам спрэчкі прэзідэнта ЗША Доналда Трампа з прэзідэнтам Украіны Уладзімірам Зяленскім у Белым доме 28 лютага, пасля якой Украіна была пазбаўленая вайсковага падтрымання з боку Злучаных Штатаў.
Якуб Хруст belsat.eu
