Намеснік генеральнага дырэктара Навукова-практычнага цэнтру геалогіі Васіль Колб расказаў у эфіры СТВ, дзе ў Беларусі шукаюць рэдказямельныя металы. Адпаведны загад на мінулым тыдні даў Аляксандр Лукашэнка.
Васіль Колб адзначыў, што шэраг рэдказямельных металаў і элементаў (малібдэн, тулій) быў выяўлены ў Беларусі яшчэ за савецкім часам. Але залягаюць яны «на досыць вялікай глыбіні, 200-250 метраў», таму казаць пра прамысловыя маштабы іх здабычы пакуль немагчыма.
Геолаг таксама заявіў, што ў беларускіх спецыялістаў няма досведу здабычы такіх карысных выкапняў, таму нават для ацэнкі перспектываў радовішчаў – выявіць глыбіню залягання, падлічыць рэсурсы і запасы, а таксама вызначыцца з тэхналогіяй здабывання – давядзецца запрашаць расейскіх калег.
«А потым ужо будзем глядзець, ці эканамічна наогул рэнтабельна, мэтазгодна далей праводзіць дэталёва працы, і потым ужо казаць аб пытаннях здабывання, здабычы», – сказаў ён.
Ва Украіне, дадаў Колб, рэдказямельныя выкапні залягаюць на меншай глыбіні, чым у Беларусі:
,,«Адпаведна, эканоміка здабычы там з плюсам, у нас дзесьці малаэфектыўная або пакуль немэтазгодная».
Апрача таго, беларускія геолагі шукаюць у краіне новыя радовішчы нафты. У прыватнасці, даследуюць дзеля гэтага Аршанскую западзіну ў Віцебскай вобласці. Але пакуль там замест нафты робіцца акцэнт на здабычы крэйды, шклянога пяску і будаўнічага каменю.
4 сакавіка Аляксандр Лукашэнка даручыў віцэ-прэм'еру Юрыю Шулейку «ўпірацца» і «капаць», каб паглядзець, «што ёсць у нас у зямлі».
«Рэдказямельныя металы вымаўляе толькі [Доналд] Трамп у Злучаных Штатах Амерыкі. Вы над гэтым пакуль не задумваліся. Іх шмат не бывае ў зямлі. Можа, у нас не менш, чым у іншых?» – паставіў пытанне палітык.
На наступны дзень у Міністэрстве прыродных рэсурсаў і аховы навакольнага асяроддзя заявілі, што шукаць рэдказямельныя элементы і металы будуць у Гомельскай і Гарадзенскай вобласцях.
Якуб Хруст belsat.eu
