Улады Беларусі далі непублічны дазвол на тое, каб прымаць на працу людзей, якія ў 2020 годзе паставілі подпісы за альтэрнатыўных кандыдатаў.
Пра гэта заявілі прадстаўнікі арганізацыі былых сілавікоў «BYPOL» са спасылкаю на сваю крыніцу інфармацыі.
У арганізацыі падкрэслілі, што іншых падрабязнасцяў, датычных гэтай інфармацыі, няма. Яны дапусцілі, што гэткая пастанова ўладаў звязаная з «катастрафічным кадравым голадам, які адчуваюць многія галіны пасля масавых звальненняў "нядобранадзейных" спецыялістаў».
У «BYPOL» нагадалі, што пасля так званых выбараў 2020 года спецслужбы і сілавыя структуры Беларусі актыўна шукалі не толькі ўдзельнікаў масавых пратэстаў, але і тых, хто падпісваўся або галасаваў за альтэрнатыўных кандыдатаў. З 2020 да 2023 года «нелаяльных» грамадзянаў звальнялі з дзяржаўных установаў і сілавых ведамстваў, нярэдка асуджаючы на рэальныя тэрміны зняволення паводле сфабрыкаваных абвінавачанняў, незалежна ад іх дасведчанасці і прафесіяналізму.
Звальненні праводзіліся «спісамі» і расцягваліся ў часе, каб не парушаць працоўнага працэсу і функцыянавання дзяржаўных органаў. Пад рэпрэсіі трапілі нават высокакваліфікаваныя спецыялісты, у тым ліку з галінаў аховы здароўя і навукі.
Раман Шавель belsat.eu
