Злучаныя Штаты Амерыкі паведамілі сваім хаўруснікам, што маюць намер спыніць свой удзел у планаванні будучых вайсковых вучэнняў у Еўропе. Замарожванне амерыканскага планавання распаўсюджваецца на вучэнні, што маюць адбыцца пасля 2025 года.
Пра гэта кажуць крыніцы шведскага выдання «Expressen».
Калі інфармацыя праўдзівая, то гэта азначае, што краіны NATO у Еўропе будуць вымушаныя планаваць вучэнні без удзелу ЗША або з удзелам толькі невялікіх амерыканскіх падраздзяленняў. Гэтыя звесткі таксама ёсць дадатковай прыкметаю меркаванага скарачэння амерыканскай вайсковай прысутнасці ў Еўропе.
,,«Калі гэта праўда, што цалкам верагодна, бо яны кажуць пра скарачэнне абавязанняў і пра тое, што задзейнічаецца камандаванне Індыйска-Ціхаакіянскага рэгіёну, то лагічным следствам будзе тое, што яны не будуць марнаваць столькі намаганняў, часу і грошай на трэнаванні ў Еўропе», – адзначыў былы падпалкоўнік Ёакім Паасіківі.
Ва Узброеных сілах Швецыі адмовіліся каментаваць гэтую інфармацыю, але адзначылі «добрую супрацу» з ЗША.
Амерыканскія войскі выйдуць з Нямеччыны?
Паводле звестак «The Telegraph», прэзідэнт ЗША Доналд Трамп абмяркоўвае вывад каля 35 000 амерыканскіх войскаў з Нямеччыны і перадыслакацыю іх ва Усходнюю Еўропу, у прыватнасці, у Вугоршчыну, якая падтрымлівае шчыльныя стасункі з Расеяй.
Адзначаецца, што Трамп разглядае магчымасць перадыслакацыі часткі амерыканскіх войскаў у Еўропе, каб яны былі сканцэнтраваныя вакол краінаў NATO, якія павялічылі свае абаронныя выдаткі, каб дасягнуць мэтавых паказнікаў ВУП.
Якуб Хруст belsat.eu
