У Беларусі амаль пяць гадоў доўжацца масавыя палітычныя рэпрэсіі: штодня навіны пра новыя затрыманні, суды, пакаранні і забароны. «Белсат» расказвае, што адбылося за адзін дзень 7 сакавіка.
З абноўленага «спісу экстрэмістаў» Міністэрства ўнутраных справаў сталася вядома, што за ўдзел у пратэстах асудзілі 71-гадовую пенсіянерку Ніну Барысевіч. Вядома толькі, што прысуд паводле ч. 1 арт. 342 КК РБ набыў моц і што судзімасць не пагашаная, іншыя падрабязнасці не прыведзеныя.
У «спісе экстрэмістаў» ужо 5023 чалавекі – 7 сакавіка ў яго дадалі 33 прозвішчы. Большасць «экстрэмістаў» – беларусы, асуджаныя за ўдзел у мірных пратэстах, за падтрыманне дэмакратычных сілаў ці за выказванні супраць Аляксандра Лукашэнкі.
Чарговы раз папоўнілі і спіс «экстрэмісцкіх матэрыялаў». Новыя матэрыялы – ад Telegram-каналу групы цяжкага ўзбраення батальёну «Тэрор» да «Аднакласнікаў» хрысціянскага дэмакрата Віталя Рымашэўскага і Instagram лідара «Гавары праўду» Андрэя Дзмітрыева.
«Гомельская вясна» даведалася 7 сакавіка пра тое, як пакаралі аднаго з тыповых удзельнікаў «спісу экстрэмістаў» – асуджанага яшчэ ў кастрычніку 2023 года Уладзіслава Наважэнцава: за «распальванне варожасці», «знявагу Лукашэнкі» і «знявагу прадстаўніка ўлады» яму далі тры гады калоніі агульнага рэжыму. У чым выявіліся ўсе гэтыя «злачынствы», невядома: суд праходзіў у закрытым рэжыме.
У Менскім гарадскім судзе 7 сакавіка пачалі судзіць журналістку і зоаабаронцу Паліну Піткевіч. Яе вінавацяць ва «ўдзеле ў экстрэмісцкім фармаванні» – праекце «Media IQ». Ёй пагражае да шасці гадоў пазбаўлення волі.
Адмысловы спавяшчальнік Арганізацыі Аб’яднаных Нацыяў выказалі занепакоенасць беларускім законапраектам, які забароніць асуджаным за «экстрэмізм» займацца педагагічнай і адукацыйнай дзейнасцю. Яны адзначылі, што расплыўчатае азначэнне «экстрэмізму» супярэчыць прынцыпу прававой дакладнасці і стварае ўмовы для злоўжывання. Яны заклікалі прывесці беларускае заканадаўства ў адпаведнасць з міжнародным правам.
Праваабарончы цэнтр «Вясна» звярнуў увагу на суды за «заклікі да санкцыяў»: цягам апошніх трох з невялікім гадоў за гэта асудзілі 188 чалавек. Заклікі да санкцыяў, у тым ліку ў форме каментароў у Telegram-канале, прыраўнялі да заклікаў да захопу ўлады ці актаў тэрарызму, адзначаюць юрысты.
Гарадзенскія праваабаронцы «Право имеют» расказалі гісторыю актывісткі Аляксандры Васілевіч: жанчына ўжо 7 гадоў жыве ў Злучаных Штатах, нядаўна ёй патэлефанавалі з гарадзенскага кіраўніцтва Камітэту дзяржаўнай бяспекі і запрасілі «на размову». Паводле жанчыны, размова скончылася, калі супрацоўнік КДБ зразумеў, што яна да яго не паляціць, ды і ён наўрад ці зможа прыехаць да яе на размову.
Магілёўскія праваабаронцы «Mayday» паведамілі пра новую форму здзекаў са сваякоў палітвязняў: у жаночай папраўчай калоніі № 4 на кароткатэрміновых спатканнях наведнікам не даюць дастаткова крэслаў. На такія спатканні – размовы праз шкло па тэлефоне – могуць прыехаць да трох родных зняволенага. Але ў пакоі на 8 тэлефонаў ставяць толькі 8 крэслаў для наведнікаў. Дасведчаныя родзічы зняволеных пачалі ездзіць на спатканні не па тры, а па два, бо размовы стоячы «не вітаюцца», а ўдвох прасцей усядзець на адным крэсле.
Ананімны Telegram-канал, звязаны з сілавікамі, 7 сакавіка заявіў пра ўзлом рэсурсаў арганізацыі «BELPOL». Прадстаўнік арганізацыі Уладзімір Жыгар заявіў радыё «Свабода», што ўзломаў, зліваў ці выцекаў не было, праца ідзе ў штатным рэжыме, «усе крыніцы на сувязі».
Алесь Наваборскі belsat.eu
