Міжнародныя рэзервы краіны перавысілі $ 9,4 млрд, паведаміў Нацыянальны банк. Столькі ў дзяржаўным скарбе яшчэ ніколі не было. «Белсат» спытаў эканамістку Настассю Лузгіну, адкуль грошы.
Папярэдні рэкорд Нацыянальны банк зафіксаваў у студзені 2020 года, тады ў «заначцы» было $ 9,39 млрд. Паводле звестак на 1 сакавіка, у рэзервах цяпер $ 9,4 млрд.
Гэтыя рэзервы складаюцца з золата, валюты, спецыяльных правоў запазычання (гэта інструмент Міжнароднага валютнага фонду) і іншых актываў. Найбольшая доля ў дзяржаўным скарбе Беларусі прыпадае на золата і валюту.
«Цяпер мы бачым, што прыярытэт аддаецца золату, і гэта апраўдана, бо за апошні год золата вырасла ў цане больш як на 30 %», – каментуе «Белсату» эканамістка даследчага цэнтру BEROC Настасся Лузгіна.
Яна растлумачыла, што цяперашні рост беларускіх рэзерваў акурат тлумачыцца падаражэннем золата:
,,«Гэтыя змены ў ЗВР Беларусі збольшага і тлумачацца дынамікаю золата, то бок золата прырастае ў цане, адпаведна, у доларавым эквіваленце рэзервы павялічваюцца. Калі браць апошнія месяцы, мы ўжо бачылі гэтае павышэнне, хаця за месяц яно было не такім вялікім, за люты – на $ 74 млн».
Адмыслоўца канстатавала, што Нацбанк не публікуе інфармацыі, колькі фізічна золата ў рэзервах, толькі яго кошт у доларах, такім чынам статыстыка не дазваляе даведацца, купляе рэгулятар метал ці, наадварот, прадае:
«Можна паглядзець толькі эквівалент у доларах, і ўсё. Колькі канкрэтна там тонаў захоўваецца ў рэзервах, гэтага вызначыць нельга».
І хаця скарб на чорны дзень цяпер дасягнуў максімуму, ён усё адно не такі вялікі, як мае быць, адзначыла Лузгіна:
,,«Існуе паказнік дастатковасці рэзерваў: яны мусяць быць роўныя тром месяцам імпарту. То бок тры месяцы і болей – гэта добры ўзровень. У Беларусі пакуль не дацягваюць да гэтага паказніку. Чым больш золатавалютныя рэзервы краіны, тым лепш, бо гэта такі запас бяспекі, што падстрахуе ў выпадку крызісу і рэзкага росту попыту на валюту».
Сцяпан Кубік belsat.eu
