Працаўнікі нацыянальнага парку «Прыпяцкі» чакаюць пачатку гняздоўя белай блакітніцы – самага рэдкага віду сініцы ў Беларусі. Для птушкі пачалі развешваць штучныя гнёзды.
Да канца сакавіка плануецца зрабіць 60 гнёздаў.
Белая блакітніца, або белая сініца, або князёк – невялікая пеўчая птушка сямейства сініцавых. Мае блакітна-жоўтае апярэнне. Яна невялікая – размах крылаў да 21 сантыметра. Унесеная ў Чырвоную кнігі Рэспублікі Беларусь. Гэта самы рэдкі з сямі відаў сініцаў, што жывуць у нашай краіне, – іх налічваецца каля 500-800 параў.
У 2022 годзе белая блакітніца была прызнаная ў Беларусі птушкаю года.
Асноўнае месца пражывання гэтай рэдкай птушкі – Цэнтральная Еўразія да ўзбярэжжа Японскага мора. На захадзе яна сустракаецца толькі ў Беларусі, пераважна на абалоне Прыпяці і яе прытокаў. Турысты едуць у гэтыя мясціны адмыслова, каб пабачыць белую блакітніцу.
Марыя Міхалевіч belsat.eu
