Амерыканскі блогер Мар’ё Нофал апублікаваў размову з Аляксандрам Лукашэнкам. Інтэрв'ю атрымалася «экспартным», уласна пра Беларусь там вобмаль. Аналітыкі Валер Карбалевіч і Вадзім Мажэйка растлумачылі «Белсату» сэнс гэтай піяр-акцыі.
Інтэрв'ю было запісанае 27 лютага, сёння яно было апублікаванае і блогерам, і беларускай прапагандай, прычым, як спраўдзіў «Белсат», абедзве версіі аднолькавыя.
Мар’ё Нофал пытаў Аляксандра Лукашэнку пра вайну, пра ягонае стаўленне да цяперашняй адміністрацыі ЗША на чале з Доналдам Трампам, пра Уладзіміра Пуціна, пра ядравую зброю, пра мяцеж Яўгенія Прыгожына. Наўпрост пра Беларусь пытанне было адно: ці гатовы Лукашэнка «перагарнуць старонку» і дараваць тым, хто «памыліўся» ў 2020 годзе.
«У гэтым мая задача, і мы гэта робім. Той, хто памыліўся, хто быў адурманены, яны мусяць жыць на сваёй зямлі, ствараць сем'і і гадаваць дзяцей. Гэта адна з маіх задачаў», – запэўніў палітык.
Пры гэтым рэпрэсіі ў Беларусі не спыняюцца, а палітычны аглядальнік радыё «Свабода» Валер Карбалевіч у каментары «Белсату» нагадаў пра нядаўнія словы Лукашэнкі пра тое, што публічным людзям з аховы здароўя, адукацыі, медыяў, культуры і спорту немагчыма дараваць «выступ супраць дзяржавы», а фактычна – нязгоду з фальсіфікацыяй выбараў у 2020 годзе.
«Калі ён рабіў кадравыя прызначэнні, там зусім па-іншаму былі расстаўленыя акцэнты наконт палітычна нелаяльных, наконт палітычных апанентаў. Ён адназначна сказаў, што гэта ворагі, яны парушылі закон, яны не могуць ніяк працаваць у такіх структурах. Так што курс на рэпрэсіі быў адназначна падкрэслены, і гэта моцна супярэчыць таму, што Лукашэнка сказаў у інтэрв'ю. Так што тут усё залежыць ад таго, з кім размаўляе Лукашэнка ў дадзены момант», – падкрэсліў Карбалевіч.
Паводле суразмоўцы «Белсату», галоўны глядач гэтага інтэрв'ю сядзіць у Белым доме, пагатоў, Нофал – прыхільнік новай каманды ў Вашынгтоне:
«Лукашэнка хацеў бы скарыстацца тым, што каманда Доналда Трампа робіць вялікія перамены ў вонкавай палітыцы, скарыстацца такой кан'юнктурай, каб перазагрузіць беларуска-амерыканскія стасункі. Тут важна ўпісацца ў працэс нармалізацыі стасункаў ЗША з Расеяй, што намячаецца, каб не апынуцца ў той сітуацыі, якая была раней, у двухтысячныя гады, калі амерыканска-расейская супраца была нармальнай, а Беларусь была пад санкцыямі».
Эксперт звярнуў увагу, што Лукашэнка ніколі нікога так не хваліў, як цяпер у гэтай размове Трампа:
,,«Лукашэнка хацеў бы падштурхнуць ЗША да перазагрузкі стасункаў, і таму ён грукаецца ў вашынгтонскую браму і спрабуе звярнуць на сябе ўвагу. Ён так моцна хваліў Трампа: неймаверная асоба, пасланы богам... Здаецца, так Лукашэнка не хваліў ні Пуціна, ні каго-небудзь іншага з сусветных палітыкаў. Нават даў указанне шукаць рэдказямельныя металы, раптам гэта зацікавіць Трампа, і нават запрасіў яго прыехаць у Беларусь».
Палітычны аналітык Вадзім Мажэйка ў каментары «Белсату» пагадзіўся, што ў гэтым інтэрв'ю цяжка не заўважыць імкненне Лукашэнкі спадабацца прэзідэнту ЗША:
,,«Трамп моцны, Трамп можа зрабіць шмат і карыснага, і, наадварот, непрыемнага для Лукашэнкі – і палітычнага, і эканамічнага. Таму – чаму б не паспрабаваць пасябраваць? Лукашэнку хацелася б, каб на яго з Вашынгтону моцна не ціснулі, а добра да яго ставіліся».
Уплыў ЗША, дарэчы, прызнаў Лукашэнка: «Давайце казаць шчыра. Гэтыя санкцыі, што былі ўведзеныя супраць нас і Расеі, паказалі, што ад Злучаных Штатаў Амерыкі шмат што залежыць».
Таксама палітык паўтарыў наратыў пра тое, што «ненавідзіць пасярэдніцтва», і тут жа фактычна прапанаваў пасярэдніцкія паслугі: маўляў, наконт Украіны можна дамовіцца ў Беларусі:
«Прыязджайце. Вось тут сядзем спакойна, без гвалту, без крыкаў, дамовімся. Таму перадайце Трампу: я яго чакаю тут разам з Пуціным і Зяленскім. Сядзем і спакойна дамовімся, калі вы хочаце дамовіцца».
Можна падумаць, што Пуцін і Зяленскі ўжо ледзь не едуць у Менск, толькі аднаго Трампа тут не стае, аднак Валер Карбалевіч мяркуе, што гэта толькі рытарычны прыём:
«Гэта даўняя пазіцыя Лукашэнкі, ён увесь час прэтэндуе на статус пасярэдніка яшчэ з часоў пасля Крыму, калі ў Менску былі перамовы, былі менскія пагадненні, і з таго часу Лукашэнка бясконца шмат разоў казаў, што мы за мір, і мы гатовыя быць пасярэднікам, і мы гатовыя прыняць перамовы тут, у Беларусі. І нават былі спробы ў пачатку вайны. Таму гэта не новае нешта. Старая добрая лінія, якую Лукашэнка цяпер у новых умовах паўтарае. Ён калісьці і Джо Байдэна запрашаў у Менск».
На інтэрв'ю Лукашэнка скарыстаўся пытаннем пра тое, як ён ацэньвае крокі цяперашніх уладаў ЗША, і з ахвотаю пачаў раздаваць парады Трампу і ягонаму атачэнню: маўляў, «бывае, трэба дзеля папулізму нешта сказаць, аднак гэта – у перадвыбарчую кампанію», а цяпер ужо ўсё, варта не гучныя заявы рабіць, а займацца рэальнымі справамі і паказваць вынікі. Іначай – на наступных выбарах у Кангрэс ці прэзідэнцкіх выбарах рэспубліканцы зазнаюць «страшэнную паразу».
«Гэта ягоная любімая тэма: „Я і вялікія“, – кажа Карбалевіч. – Як толькі ён узгадаў Трампа, ён сказаў: ну, магу даць нават парады Трампу, як трэба сябе правільна паводзіць, якія заявы рабіць, якія не рабіць. Маўляў, я ж ужо даўно ў палітыцы, трыццаць гадоў, а Трамп – навічок, можна павучыць яго».
А расказваючы пра прыгожынскі мяцеж, Лукашэнка заявіў, што заходнія выведкі, ЦРУ і MI-6, нібыта пахвалілі яго за ўдзел у залагоджванні бунтаўніка, і ўскосна прызнаў праўдзівасць запісу ягонай размовы з Прыгожыным, якую распаўсюдзіў расейскі ананімны Telegram-канал «ВЧК-ОГПУ»:
«Нядаўна апублікавалі нашую размову, сказіўшы яе. Штучны інтэлект усё ж працуе. Мае супернікі на Захадзе апублікавалі размову, сказіўшы яе і дадаўшы там свае акцэнты. Аднак сутнасна размова такая была, і мне ўдалося пераканаць Прыгожына, што ён не даб'ецца сваіх мэтаў».
«Самапіяр – неабходны элемент любога інтэрв'ю», – заўважыў на гэта Карбалевіч.
Акрамя таго, Лукашэнка паўтарыў пагрозу нападу Расеі на Беларусь, калі б нашая краіна пасля змены ўлады ў 2020 годзе пайшла насустрач Захаду і NATO, аднак, бадай, упершыню прызнаў, што Пуцін не папярэджваў яго пра ўварванне ва Украіну, адзначыў палітычны аглядальнік радыё «Свабода»:
,,«Ён, здаецца, упершыню так выразна пацвердзіў, што не ведаў пра тое, што Пуцін пачне вайну. Думаю, што гэта праўда: адразу пасля пачатку вайны Лукашэнка казаў, што Пуцін патэлефанаваў у пяць гадзінаў раніцы і паведаміў, а Макей расказваў, што ніводны расейскі салдат не застанецца ў Беларусі пасля вучэнняў. Таму я думаю, што Пуцін сапраўды свайго бліжэйшага саюзніка не ставіў у вядомасць адносна ўсіх сваіх планаў».
Агулам, як падсумаваў Вадзім Мажэйка, Лукашэнка ў гэтым інтэрв'ю «стараўся быць коцікам»:
«Лукашэнка намагаўся быць максімальна міралюбівым, праамерыканскім, размаўляць, як ён бачыць, з пункту гледжання інтарэсаў Амерыкі. Лукашэнка звяртаўся да амерыканцаў і Трампа, больш-менш глядзеў і на беларускі электарат. А вось на Расеі разлічваў досыць адносна, бо там былі як прыемныя для Масквы пасажы адносна таго, што трэба сябраваць, але былі і досыць непрыемныя рэчы, якія наўрад ці Лукашэнка казаў бы расейскім медыям, калі Расея фактычна засоўвалася на трэці план пасля ЗША і Кітаю».
Сцяпан Кубік belsat.eu
