4 сакавіка Польшча дадала ў санкцыйны спіс Міністэрства ўнутраных справаў беларускае прадпрыемства «МетаТрэйдынгПрам», што пастаўляе ўгнаенні (карбамід) у Польшчу.
Кампанія з кастрычніка 2024 года экспартуе ў Польшчу з Беларусі карбамід прамысловага прызначэння. Прадпрыемства было заснаванае ў красавіку 2024 года, у жніўні, як заяўляецца на сайце, пачало вырабляць угнаенні.
Міністэрства ўнутраных справаў і адміністравання Польшчы зазначае, што прамысловая вытворчасць карбаміду магчымая толькі на вельмі буйных прадпрыемствах, бо абсталяванне займае вялікія плошчы, некалькі гектараў, і мусіць адпавядаць строгім стандартам бяспекі і аховы навакольнага асяроддзя. Хутка наладзіць вытворчасць такой прадукцыі немагчыма, сцвярджае ведамства. Таму польскі бок прыходзіць да высновы, што насамрэч угнаенні вырабляюцца на «Горадня Азоце», а «МетаТрэйдынгПрам» – пасярэднік для рэалізацыі.
ААТ «Горадня Азот» з 2 снежня 2021 года застаецца пад санкцыямі Еўразвязу, таму Польшча залучыла ў санкцыйны спіс і меркаваную кампанію-пасярэдніка.
Усе сродкі і эканамічныя рэсурсы «МетаТрэйдынгПрам» будуць замарожаныя, кампанія будзе выключаная з працэдуры польскіх дзяржаўных закупаў і конкурсаў.
24 лютага, у трэцюю гадавіну поўнамаштабнага ўварвання Расеі ва Украіну, Еўразвяз прыняў чарговы пакет санкцыяў, што ўводзіць сур’ёзныя абмежаванні супраць эканомік Расеі і Беларусі. Гэта ўжо 16-ы паводле ліку пакет, прыняты Еўразвязам з 2022 года. Паводле прадстаўніцы Еўразвязу ў замежных справах і палітыцы бяспекі Каі Калас, гэта «самыя маштабныя санкцыі за ўсю гісторыю, што аслабляюць ваенныя высілкі Расеі».
У лік прадпрыемстваў, што апынуліся пад дзеяннем новага пакету санкцыяў, трапіў «Інтэграл» – найбуйнейшы беларускі вытворца паўправаднікоў і мікрасхемаў.
Марыя Міхалевіч belsat.eu
