Аляксандр Лукашэнка 27 лютага даў інтэрв’ю блогеру Мар’ё Нофалу, звязанаму з Іланам Маскам. Поўная версія размовы выйшла ў акаўнце Нофала ў Х 4 сакавіка. Распавядаем, пра што ішла гаворка паўтары гадзіны.
Ці выкарыстае Расея ядравую зброю?
У размове з амерыканскім блогерам Аляксандр Лукашэнка распавёў, у якім выпадку, на ягоны погляд, Расея можа выкарыстаць ядравую зброю. Агулам палітык лічыць, што цяпер ні ЗША, ні Расея не гатовыя да выкарыстання ядравай зброі. Са словаў Лукашэнкі, наўпрост гэтай тэмы з Пуціным яны не абмяркоўвалі, але ў той жа час Пуцін ніколі і не казаў, што гатовы да крайніх мераў.
,,«Я не думаю, што ён гатовы. Ён настолькі быў гатовы націснуць чырвоную кнопку, наколькі вы ў ЗША, у Англіі ці Францыі былі да гэтага гатовыя. Ведаю, вы не былі да гэтага гатовыя. Гэтак жа да гэтага не быў гатовы і Пуцін. Ён, як ніхто іншы, разумее, да чаго гэта ўсё можа прывесці. Таму абсалютна дакладна заяўляю, што Пуцін ніколі не трымаў пульта з чырвонай кнопкай у руках, каб праз некалькі хвілінаў націснуць гэтую чырвоную кнопку», – сказаў Лукашэнка.
У той жа час, са словах кіраўніка Беларусі, «калі толькі будзе здзейсненая агрэсія супраць Беларусі і Расеі, тады будуць выкарыстаныя ўсе метады барацьбы». Аднак не факт, што пачнецца з ядравага супрацьстаяння:
«Шмат жа іншых метадаў: і дыпламатычных, і сілавых, звычайная зброя і гэтак далей. Той жа «Орешник» і іншае. Ніхто не будзе хапацца за ядравую кнопку. Але калі пагроза будзе надзвычайная, то дзеля гэтага і існуе гэтая зброя, каб яе выкарыстаць».
«Не трэба нахіляць Зяленскага»
Пра расейскую ядравую зброю ў Беларусі Лукашэнка нічога не захацеў казаць, а перавёў тэму размовы на Доналда Трампа і на тое, як Лукашэнка задаволены, што Трампа абралі ў сітуацыі, калі ў свеце пачаліся размовы пра ядравую зброю. Лукашэнка казаў пра тое, што ў Трампа шмат дзяцей, ён іх любіць, а ягоны малодшы сын яшчэ і падобны да Мікалая Лукашэнкі, і таму Трамп ніколі не націсне на чырвоную кнопку.
Адначасова кіраўнік Беларусі даў Трампу параду «астыць» ды запрасіў яго, Пуціна і Зяленскага ў Менск на перамовы.
,,«Не трэба Зяленскага цяпер нахіляць, якім бы ён ні быў. Трэба пераканаць, дамовіцца і з Зяленскім, таму што за Зяленскім стаіць большая частка ўкраінскага грамадства. Таму трэба дамаўляцца. Хочаце – прыязджайце. Вось, побач – 200 кіламетраў ад беларускай мяжы да Кіева. Паўгадзіны на самалёце. Прыязджайце. Вось тут сядзем. Спакойна, без шуму, без крыкаў дамовімся. Таму перадайце Трампу: я яго чакаю тут разам з Пуціным і Зяленскім. Сядзем і спакойна дамовімся. Калі вы хочаце дамовіцца», – сказаў Лукашэнка Нофалу.
Пра Кітай і Еўразвяз
Таксама, на думку Лукашэнкі, Трампу не трэба ісці на супрацьстаянне з Кітаем, бо Злучаныя Штаты не змогуць унесці разладу ў адносіны Кітаю з Расеяй.
«Не трэба з бухты-барахты нападаць на Кітай. З Кітаем вам трэба дамовіцца. […] Вы Кітаю не спыніце. Гэта не мы, не Расея. Гэта Кітай. Там народ заточаны, паўтара мільярда чалавек заточаныя абараняць Кітай да апошняга», – сказаў Лукашэнка.
Выказаўся Лукашэнка і наконт будучыні Еўропы, якая, на ягоную думку, магчымая толькі ў саюзе з Расеяй:
«Будучыня Еўропы, магчыма, была б добрай толькі ў саюзе з Расеяй. Калі б еўрапейцы, Еўразвяз наладзіў добрыя, нармальныя зносіны хаця б у эканоміцы з Расеяй, яны б квітнелі».
Аднак, паколькі Еўразвяз – канкурэнт ЗША, «адзінства Еўразвязу і Расеі, напэўна, не зусім выгаднае для Злучаных Штатаў Амерыкі», мяркуе Лукашэнка.
Кіраўнік Беларусі агулам шмат казаў пра Трампа, даваў ацэнкі ягоным дзеянням і парады як адносна вонкавай, так і ўнутранай палітыкі.
,,«Вось там, у Амерыцы, мяне не хапае. Вось я б Трампу проста ў вочы сказаў бы, як нельга рабіць. Занадта шмат заяваў, якіх увогуле не трэба было агучваць, – сказаў Лукашэнка. – [...] Вам трэба сёння ў ЗША астыць, супакоіцца і займацца тым, што вы агучылі. Вы агучылі шмат добрых рэчаў. Але самае галоўнае, вы павінны заняцца ўнутранымі праблемамі Злучаных Штатаў. Вы ў працэсе перадвыбарчай кампаніі шмат абяцалі людзям – выбарнікам. Калі цягам года ніякіх зрухаў не здзейсніце там, не выканаеце сваіх абяцанняў, вас чакаюць страшныя, жахлівыя часы».
Ці будзе «перагорнутая» старонка?
Нофал запытаўся ў Лукашэнкі і пра падзеі ў Беларусі ў 2020 годзе ды пра тое, ці гатовы ён «перагарнуць старонку і даць шанец тым, хто памыліўся тады, у 2020 годзе, крыху перахваляваўся, вярнуцца, прабачыць ім».
Лукашэнка адказаў, што ўжо робіць гэта:
«У гэтым мая задача: той, хто памыліўся, той, хто адурманены быў, – яны павінны жыць на сваёй зямлі, ствараць сем’і і расціць дзяцей».
Мар'ё Нофал нарадзіўся ў Ліване, мае аўстралійскае грамадзянства і дазвол на жыхарства ў ААЭ. Вядомы як амерыканскі крыптапрадпрымальнік, блогер, аўтар праекту «Круглы стол» у Х, у межах якога робіць відэаінтэрв’ю з палітычнымі і грамадскімі дзеячамі.
Гасцямі Нофала былі прэм’ер-міністр Славаччыны Робэрт Фіца, былы прэзідэнт Бразіліі Жаір Баўсанару, былы прэм’ер-міністр Пакістану Імран Хан, чалец кіроўнай сям’і Саудаўскай Аравіі аль-Ўалід бін-Таляль аль-Сауд, прадпрымальнік Ілан Маск, амерыканскія бізнесоўцы і кангрэсмены. Блогер кажа, што выступае за тое, каб ЗША і Расея сталіся сапраўднымі саюзнікамі.
Паводле «NBC News», Нофал накручваў сабе аўдыторыю ў X – тады яшчэ Twitter – тысячаю фальшывых акаўнтаў, якія стваралі ўяўную папулярнасць прадпрымальніка. Урэшце ён заняўся падкастамі. На платформе «Clubhouse» сабраў аўдыторыю памерам 50 тысячаў чалавек (што было нямала для новай на той момант платформы), але неўзабаве быў заблакаваны з невядомай прычыны. Затым ён нарасціў актыўнасць на X, дзе пачаў называць сябе грамадзянскім журналістам і весці аўдыяшоу.
Нофала часам называюць «пратэжэ Маска», але наўпроставых доказаў іхнай блізкай сувязі не знаходзіцца. Нофал хваліць Маска, Маск за гэта хваліць Нофала, яны распаўсюджваюць аднолькавую дэзынфармацыю і заўзеюць за адных і тых жа дыктатараў. Нофала яшчэ паўтара года таму называлі «першаю крыніцаю навінаў пра Расею для Маска».
Марыя Міхалевіч belsat.eu
