З 3 да 6 сакавіка беларуская дэмакратычная лідарка наведае чатыры італьянскія гарады – Рым, Фларэнцыю, Мілан і Балонню. Падчас працоўнага візіту Святлана Ціханоўская правядзе шэраг сустрэчаў на найвышэйшым узроўні.
Як паведамілі ў Офісе палітыка, Святлана Ціханоўская выступіць з прамоваю на другой сустрэчы альянсу «За дэмакратычную Беларусь», да якой далучацца прадстаўнікі 20 парламентаў з розных краінаў, беларускія эксперты і праваабаронцы, а таксама чальцы Каардынацыйнай рады, беларускіх палітычных партыяў і народных амбасадаў. Першая такая сустрэча прайшла ў Нямеччыне ў 2023 годзе.
Ціханоўская абмяркуе з мэрамі Фларэнцыі, Мілану і Балонні магчымасць вылучэння памяшкання для беларускага шэлтару, а ў Мілане наведае адкрыццё выставы, прысвечанай беларускім палітычным вязням.
,,«Для нас вельмі важна, каб голас Італіі падтрымаў Беларусь. Італія цяпер захоўвае добрыя стасункі як з Вашынгтонам, так і з Бруселем. І калі гавораць пра Украіну, важна, каб згадвалі свабодную і дэмакратычную Беларусь», – сказаў у каментары «Белсату» галоўны дарадца Ціханоўскай Франак Вячорка.
Паводле яго, важна, каб Беларусь не знікла з парадку дня, бо «ў гэтым шуме, які цяпер адбываецца ў інфармацыйнай прасторы, вельмі лёгка згубіцца».
«Мы тлумачым, што, калі гаварыць пра гарантыі бяспекі для Украіны, дэмакратычная і незалежная Беларусь якраз ёсць адною з такіх гарантыяў», – сказаў дарадца.
Паводле Вячоркі, падчас візіту плануецца «абмеркаваць, дзе мы стаім, якая дапамога Беларусі патрэбная, якім чынам не даць Пуціну зафіксаваць свайго кантролю над Беларуссю». Таксама будуць узнятыя пытанні беларускай ідэнтычнасці і крокаў для вызвалення палітычных вязняў.
Вячорка адзначыў, што дэмакратычным сілам важна навязаць стасункі з уладамі італьянскіх правінцыяў і гарадоў, з прафсаюзамі і з грамадзянскаю супольнасцю, дамагчыся практычных вынікаў як у пытаннях падтрымання, гэтак і легалізацыі беларусаў, якія жывуць у краіне. Гэтак, у Фларэнцыі – сталіцы правінцыі Таскана, дзе жывуць больш за 700 беларусаў, – мяркуюць стварыць шэлтар для беларускіх уцекачоў. Таксама абмяркоўваліся культурніцкія імпрэзы з удзелам беларускіх артыстаў, бо Фларэнцыя – горад, дзе пахаваны Міхал Клеафас Агінскі.
У Балонні, сказаў Вячорка, Ціханоўскай нададуць ганаровае грамадзянства гораду.
Якуб Хруст, Антон Бяздольны belsat.eu
