Прэзідэнтка Еўракамісіі Урзуля фон дэр Ляен прэзентавала пяцікрокавы план пераўзбраення Еўрапейскага Звязу і падтрымання Украіны. Праўда, пакуль у ЕЗ з дапамогаю Кіеву выходзіць не вельмі.
Урзуля фон дэр Ляен напярэдадні пазачарговай сустрэчы лідараў ЕЗ у Бруселі прэзентавала план «ReArm Europe» – ініцыятыву мабілізацыі да 800 мільярдаў еўраў на еўрапейскую бяспеку.
Як заявілі ў Еўракамісіі, гэты план дазволіць краінам ЕЗ:
- значна павялічыць выдаткі на абарону згодна з бюджэтнымі правіламі,
- атрымаць крэдыты на 150 мільярдаў еўраў для супольных абаронных праектаў і павялічыць падтрыманне Украіны;
- выкарыстоўваць сродкі ЕЗ для інвестыцыяў, звязаных з абаронаю;
- прыцягнуць прыватны капітал для ўмацавання абаронна-прамысловай базы.
Вугоршчына перашкаджае
Між тым, як паведамляе «Politico», Еўразвяз прыпыніў працу над вылучэннем новага пакету вайсковай дапамогі Украіне на 20 мільярдаў еўраў праз пярэчанні Вугоршчыны. У пакет меліся ўвайсці, у прыватнасці, артылерыйскія снарады, сістэмы паветранай абароны, ракеты. Паводле выдання, гэтая дапамога мусіла прысутнічаць у плане фон дэр Ляен.
Новая архітэктура бяспекі ЕЗ пачне фармавацца на экстраным пасяджэнні лідараў Еўразвязу 6 сакавіка. 19 сакавіка камісар у пытаннях абароны Андрус Кубілюс і кіраўніца дыпламатыі Кая Калас маюць прэзентаваць новую абаронна-прамысловую стратэгію.
Якуб Хруст belsat.eu
