У Беларусі ў спіс экстрэмісцкіх матэрыялаў унеслі лагатып вядомага еўрапейскага брэнду адзення «BOY London», паведамляе Праваабарончы цэнтр «Вясна».
Гаворка пра «чорнага арла з распасцёртымі крыламі, які трымае ў лапах кола ў выглядзе літары "О"». Адпаведную пастанову прыняў суд Цэнтральнага раёну Гомля 28 лютага 2025 года. На афіцыйную старонку «BOY London» толькі ў Instagram падпісаныя больш за 357 тысяч чалавек.
Таксама спіс экстрэмісцкіх матэрыялаў папоўнілі сацсеткі аналітыка Вадзіма Мажэйкі, TikTok-старонкі «FokusGrodno», «Святая Лукер’я Рыгораўна», «Alex_kamis».
Брэнд «Boy London» крытыкавалі за лагатып з арлом у розных краінах. Яго аўтарам закідалі падабенства лагатыпу да эмблемы нямецкіх нацыстаў, на якой арол глядзіць у той жа бок, але трымае ў кіпцюрах свастыку.
Брэнд не пагадзіўся з такім параўнаннем і заявіў, што марка ніякім чынам не звязаная з нацызмам, а ў якасці ўзору для лагатыпу быў узяты арол Рымскай імперыі.
Кампанія «Boy London» вядомая агульным эпатажным падыходам да дызайну.
Марыя Міхалевіч belsat.eu
