Адключэнне цеплазабеспячэння ў Мазыры 27–28 лютага было звязанае з падзеннем беспілотніка, паведамляе «Флагшток» са спасылкай на свае крыніцы ў Мазырскім раёне.
У ноч на 27 лютага ад падзення дрона была пашкоджаная адна з высакавольтных лініяў мясцовай ЦЭЦ, якая месціцца на поўдзень ад Мазыра, каля Мазырскага НПЗ.
«У выніку некарэктнага спрацоўвання аўтаматычнай сістэмы абароны аварыйна адключыліся і суседнія высакавольтныя лініі, цалкам абясточыўшы ЦЭЦ.
Пасля некалькіх спробаў станцыя была перазапушчаная, аднак паўстала новая бяда – пуск цепланосьбіта прывёў да гідраўдару ў сістэме трубаправодаў. У выніку ў некалькіх месцах быў пашкоджаны магістральны трубаправод дыяметрам 700 міліметраў», – паведамляе «Флагшток».
Такім чынам Мазыр застаўся без гарачай вады ў патрэбным аб'ёме. Зварачныя работы працягваліся да 01:10 28 лютага. Раніцай таго ж дня праблема з вадой была ліквідаваная.
Пралёт беспілотніка ў Мазырскім раёне зафіксаваў украінскі маніторынгавы канал «Рында Мониторит». Спецыяліст каналу распавёў выданню, што беспілотнік заляцеў у Беларусь 27 лютага а 04:01. Дрон быў заўважаны непадалёк Мазыра. У гэты час Украіну масава атакавалі расейскія беспілотнікі.
Мясцовыя ўлады распавялі толькі, што «пашкоджаны трубаправод цеплавой сеткі». Гэта быў першы выпадак, калі сталася вядома пра пашкоджанне энергетычнай сістэмы ў Беларусі. Таксама 27 лютага беспілотнік упаў на пабудову ў Гомельскім раёне.
Арсен Рудэнка belsat.eu
