Менскі аўтамабільны завод і Уфімскі трамвайна-тралейбусны завод зарэгістравалі сумеснае прадпрыемства для вытворчасці электратранспарту ў Башкірыі. За два гады там пабудуюць завод, піша РБК.
Новае прадпрыемства называецца «Тэрыторыя развіцця электратранспарту МАЗ – УТЗ», распавёў кіраўнік Рэспублікі Башкартастан Радый Хабіраў пасля сустрэчы з генеральным дырэктарам МАЗ Валерыем Іванковічам.
Генеральны дырэктар Уфімскага трамвайна-тралейбуснага заводу Дзяніс Рассаднікаў расказаў, што яны супрацоўнічаюць з МАЗам ужо пяць гадоў. На думку Рассаднікава, у сумеснага праекту «сур'ёзныя перспектывы, асабліва з улікам глабальнага трэнду на развіццё электратранспарту».
Кіраўнік МАЗ распавёў, што разам з уфімскім партнёрам выпушчана ўжо больш за 700 тралейбусаў.
Агульны аб'ём інвестыцыяў у прадпрыемства складзе 1,6 млрд расейскіх рублёў.
Плануецца, што новая вытворчасць дазволіць павялічыць выпуск тралейбусаў ва Уфе ўдвая – з 250 да 500 адзінак за год.
Пры гэтым МАЗ перажывае не найлепшыя часы на расейскім рынку. Продаж буйнатанажных цяжкавікоў скараціўся з 6228 у 2023 годзе да 5309 у 2024 годзе. Продаж аўтобусаў летась зменшыўся на 45,5 %.
Пасля таго як МАЗ праз санкцыі застаўся з сярэдзіны 2021 года без заходніх дэталяў, прадукцыя прадпрыемства пачала рэгулярна гарэць у Расеі, а потым былі выпадкі ўзгарання і ў Беларусі.
Арсен Рудэнка belsat.eu
