Скандальную сустрэчу ў Белым доме з удзелам Уладзіміра Зяленскага і Доналда Трампа пракаментаваў «Белсату» ўкраінскі журналіст Віталь Портнікаў. Ён упэўнены, што цяперашняя амерыканская адміністрацыя разбурае еўраатлантычную салідарнасць, і калі Еўропа «не адкажа на гэты выклік», яна рухне. Як і Украіна.
Прэзідэнт і віцэ-прэзідэнт ЗША Доналд Трамп і Джэймз Дэйвід Вэнс прабралі госця, абвінаваціўшы яго ў непавазе да Злучаных Штатаў і нежаданні дзякаваць за дапамогу.
Украінскі журналіст Віталь Портнікаў у размове з «Белсатам» звярнуў увагу, што раней амерыканскія віцэ-прэзідэнты ў такіх сустрэчах удзелу не бралі:
«Трамп свядома абраў такую мадэль правядзення сустрэчаў, дзе ён нібыта арбітр, а людзі, якія знаходзяцца побач, могуць выказаць тое, што ён сам не хацеў бы выказваць. Гэтыя людзі намагаюцца прадэманстраваць Трампу сваю патрэбнасць. Сістэма ўлады ў ЗША такая, што любая з гэтых асобаў можа за 15 хвілінаў быць замененая на іншую. Вэнс ведае, што спадабаецца Трампу».
Амерыканцы зачапіліся за вонкавы выгляд Уладзіміра Зяленскага, які з пачатку вайны не апранае гарнітураў. Спачатку на гэта звярнуў увагу Трамп, які сустракаў калегу на парозе Белага дому, а потым пытанне пра касцюм задаў журналіст.
«Гэта было зроблена толькі дзеля таго, каб вывесці Зяленскага з сябе», – упэўнены Портнікаў, бо «лук» Ілана Маска, які прыходзіў у Белы дом, «як у бар і з дзіцём на плячах», нікога не засмучаў. На думку цяперашняга кіраўніцтва Злучаных Штатаў, недарэчна апранацца так, як Зяленскі, бо вайна, маўляў, ужо скончылася:
«У свядомасці Трампа, Маска, Вэнса ды іншых прадстаўнікоў ультраправых сілаў ЗША вайна скончылася толькі таму, што ім так хочацца. Яны жывуць у прыдуманай рэальнасці. Яны ж уз'юшыліся, калі Зяленскі сказаў, што рэальнасць абрынецца на іхныя галовы і, імаверна, прывядзе да трагедыі мільёнаў амерыканцаў. Трамп ведаў, што гісторыя з гарнітурам мае выклікаць у Зяленскага пэўнае кіпенне. Яны з Вэнсам проста чакалі, калі ён сарвецца».
Суразмоўца «Белсату» прадракае цёмныя часы для Еўропы, калі яна «не зробіць высновы і не адкажа на гэты выклік»:
,,«Адміністрацыя Трампа разбурае еўраатлантычную салідарнасць. ЗША ў шмат чым разбураюць палітыку, якую самыя Штаты стварылі пасля Другой сусветнай вайны з мэтаю недапушчэння новай сусветнай вайны. Еўрапейцам неабходна падумаць, як мусіць выглядаць еўрапейская мадэль бяспекі. Калі Еўропа не зробіць высновы з таго, што адбываецца, і не адкажа на гэты выклік, яна рухне».
,,«Украіна рухне або будзе нейкае ганебнае замірэнне для Украіны. Расея здолее за 2–2,5 года ўзнавіць свае ўзброеныя сілы дзеля нападу на адну з невялікіх краінаў Еўропы, скарыстаецца акном кіравання Трампа і напрыканцы 2026 – напачатку 2027 года нападзе на краіны Балтыі ці Польшчу. Пачнецца Трэцяя сусветная вайна».
Віталь Портнікаў кажа, што пазбегнуць гэтага сцэнара можна, калі Еўропа падтрымае Украіну, будзе ўзбройвацца і створыць уласную сістэму ядравага стрымлівання.
«Уратавацца можна толькі разам, бо гэтыя тры вершнікі апакаліпсісу – чацвёртага на шчасце яшчэ няма – з Вашынгтону, Масквы і Пекіну могуць сур'ёзна падарваць еўрапейскае ўяўленне бяспекі», – падсумаваў публіцыст.
Руслан Ігнатовіч, Сцяпан Кубік belsat.eu
